Geoportal Bhuvan | న్యూఢిల్లీ: సమాచార వ్యాప్తి సామర్థ్యాలను పెంచుకోవడంలో ఇస్రో తన జియోపోర్టల్ ‘భువన్’ ద్వారా అద్భుత పురోగతిని సాధిస్తున్నది. సామాజిక అవసరాల కోసం రూపొందించిన ఈ టూల్.. ప్రపంచ సెర్చింజిన్ దిగ్గజం గూగుల్ కంటే 10 రెట్లు అధిక వివరాలతో కూడిన సమాచారాన్ని వినియోగదారులకు అందజేస్తున్నట్టు ఇస్రో చైర్మన్ ఎస్ సోమనాథ్ ఇటీవల వెల్లడించారు. వ్యవసాయం, పట్టణ ప్రణాళిక, విపత్తుల నిర్వహణ లాంటి పలు రంగాలకు ఉపయోగపడే ఎంతో విలువైన సమాచారాన్ని ‘భువన్’ అందజేస్తున్నదని తెలిపారు.
సమాచార లభ్యతను, వినియోగాన్ని పెంచేందుకు ఈ టూల్తోపాటు భువన్-పంచాయత్, ఎన్డీఈఎం (నేషనల్ డాటా బేస్ ఫర్ ఎమర్జెన్సీ మేనేజ్మెంట్) అనే మరో రెండు కొత్త టూల్స్ను ప్రవేశపెడుతున్నట్టు తెలిపారు. మెరుగైన డాటా సెట్లు, అనలిటికల్ టూల్స్ను సరఫరా చేయడం ద్వారా స్థానిక పాలనా వ్యవస్థల సాధికారతకు తోడ్పాటునందించాలన్న లక్ష్యంతో భువన్-పంచాయత్ టూల్ను రూపొందించామని, సవివరమైన జియోస్పేషియల్ డాటా ఆధారంగా గ్రామ పంచాయతీలు మెరుగైన నిర్ణయాలు తీసుకునేందుకు ఈ టూల్ ఉపకరిస్తుందని వివరించారు.