Gaurav Gogoi : ప్రధాని నరేంద్రమోదీ నేతృత్వంలోని బీజేపీపై కాంగ్రెస్ (Congress) పార్టీ మరోసారి విమర్శలు గుప్పించింది. మోదీ ప్రధానిగా ఉన్నంత కాలం పార్లమెంటరీ ప్రజాస్వామ్యం విషయంలో ఆ పార్టీ తీరు మారదని దెప్పిపొడిచింది. అయితే విపక్ష ‘ఇండియా’ కూటమికి పెరిగిన బలంతో ఈసారి పరిస్థితి భిన్నంగా ఉండనుందని చెప్పింది. ఈ మేరకు కాంగ్రెస్ నేత గౌరవ్ గొగొయ్ (Gaurav Gogoi) మీడియాతో మాట్లాడారు.
మోదీ నాయకత్వ శైలితో ఈ ఎన్డీయే సంకీర్ణ ప్రభుత్వం ఐదేళ్లకాలం అధికారంలో ఉంటుందన్న విశ్వాసం లేదని గౌరవ్ అన్నారు. ‘వారు బిల్లుల్ని ఏకపక్షంగా ఆమోదించారు. ఇప్పుడు భయపెట్టలేరు. సస్పెండ్ చేయలేరు. గత సంవత్సరం వారు 146 మంది ఎంపీలను సస్పెండ్ చేశారు. ఈసారి 230 మందిని సస్పెండ్ చేస్తారా..?’ అని గొగోయ్ ప్రశ్నించారు. మోదీ ప్రధానిగా ఉన్నంతకాలం పార్లమెంట్ ప్రజాస్వామ్యం విషయంలో వారి తీరు మారుతుందని అనుకోవడం లేదన్నారు.
‘అయితే ఫుట్బాల్ పదజాలంలో చెప్పాలంటే ఇప్పుడు డిఫెండర్స్ సంఖ్య పెరిగింది. మేం బలంగా మారాం. అలాగే కేంద్రం డీమానిటైజేషన్ గురించి ఆర్థికమంత్రికి తెలియదు. ఆర్టికల్ 370 రద్దు గురించి, అగ్నిపథ్ గురించి ఆయన క్యాబినెట్కు తెలియదు. తన క్యాబినెట్ను పరిగణనలోకి తీసుకోని వ్యక్తి.. ఎన్డీయే భాగస్వామ్య పక్షాలను ఎలా పరిగణనలోకి తీసుకుంటారు. ఆయన సంకీర్ణ ప్రభుత్వాన్ని పూర్తికాలం నడపగలరని నేను అనుకోవడం లేదు’ అన్నారు.