న్యూఢిల్లీ, జూన్ 6: పార్లమెంట్ ప్రాంగణంలో గాంధీజీ, అంబేద్కర్, ఛత్రపతి శివాజీ తదితర మహనీయుల విగ్రహాలను మరో చోటుకు తరలించడంపై వివాదం రేగింది. పాత పార్లమెంట్ భవనం,పార్లమెంట్ గ్రంథాలయం మధ్య ఉన్న పార్క్ వద్దకు వీటిని మార్చారు. కాంగ్రెస్ మీడియా విభాగాధిపతి పవన్ ఖేరా ఎక్స్లో ఆగ్రహం వ్యక్తం చేశారు. ‘మహారాష్ట్ర ఓటర్లు బీజేపీకి ఓటేయలేదని శివాజీ, అంబేద్కర్ విగ్రహాలను తొలగించారు.
గుజరాత్లో తాము క్లీన్స్వీప్ చేయలేదని గాంధీజీ విగ్రహాన్నీ పక్కకు తరలించారు. వాళ్లకు 400 సీట్లు ఇచ్చుంటే రాజ్యాంగాన్నీ వదిలిపెట్టేవారు కాదేమో’ అని ఆయన ట్వీట్ చేశారు. ఈ నెలలో పార్లమెంట్ సమావేశాల నేపథ్యంలో పార్లమెంట్ ప్రాంగణాన్ని నవీకరిస్తున్నారు. ఇందులో భాగంగా జాతీయ నాయకుల విగ్రహాలను పార్లమెంట్ ప్రాంగణంలోనే వేరే చోటికి తరలిస్తున్నారు. విగ్రహాల తరలింపు ద్వారా ఏర్పడిన ఖాళీ స్థలంలో రాష్ట్రపతి, ప్రధాని కొత్త పార్లమెంట్ భవనంలోకి ప్రవేశించే మార్గాలను నిర్మిస్తున్నారు.