ఐరాస, మే 14: గాజాపై ఇజ్రాయెల్ దాడులు కొనసాగుతున్న వేళ రఫాలో ఐరాస వాహనంపై జరిగిన దాడిలో భారత మాజీ సైనికాధికారి ఒకరు ప్రాణాలు కోల్పోయారు. దీనిపై ఐరాస సమగ్ర దర్యాప్తునకు, ఇజ్రాయెల్ వేరేగా ఒక దర్యాప్తునకు ఆదేశించాయి. మృతుడిని భారత ఆర్మీ మాజీ అధికారి కర్నల్ వైభవ్ అనిల్ కాలే(46)గా గుర్తించారు. ఆయన 2022లో ముందస్తు పదవీ విరమణ చేసి ఐరాస భద్రతా విభాగంలో రెండు నెలల కిందటే ఉద్యోగంలో చేరారని అధికారులు చెప్పారు. కాలే మృతికి ఐరాస సెక్రటరీ జనరల్ ఆంటోనియో గుటెరస్ విచారం వ్యక్తం చేశారు.