Narendra Modi | లోక్సభ ఎన్నికలు-2024 ఫలితాల వెల్లడితో కేంద్రంలో ముచ్చటగా మూడోసారి ప్రభుత్వ ఏర్పాటుకు బీజేపీ సన్నద్ధమవుతున్నది. ఈ నేపథ్యంలో బీజేపీ కేంద్ర కార్యాలయంలో పార్టీ కార్యకర్తలను ఉద్దేశించి ప్రధాని నరేంద్రమోదీ మాట్లాడుతూ.. ‘ఈరోజు చాలా పవిత్రమైన రోజు. వరుసగా మూడోసారి కేంద్రంలో ఎన్డీఏ ప్రభుత్వాన్ని ఏర్పాటు చేయబోతున్నది. ఇందుకు కారణమైన ప్రజలందరికీ ధన్యవాదాలు తెలుపుతున్నా. ‘ప్రపంచంలోనే అతిపెద్ద ప్రజాస్వామ్య దేశంలో మన విజయానికి బీజేపీ పట్ల, ఎన్డీఏ పట్ల భారతీయులంతా తమ విశ్వాసాన్ని పునరుద్ఘాటించారు’ అని వ్యాఖ్యానించారు. ప్రధాని మోదీ ‘భారత్ మాతాకీ జై’, ‘జై జగన్నాథ్’ నినాదాలతో తన ప్రసంగాన్ని ప్రారంభించారు. 1962 తర్వాత వరుసగా ఒకే ప్రభుత్వం మూడోసారి కొలువుదీరనుండటం ఇదే తొలిసారి’ అని ప్రధానిమోదీ చెప్పారు.
దేశంలోని వివిధ రాష్ట్రాల్లో గణనీయ రాజకీయ మార్పులు చోటుచేసుకున్నాయని ప్రధాని మోదీ చెప్పారు. అరుణాచల్ ప్రదేశ్, ఆంధ్రప్రదేశ్, ఒడిశా, సిక్కిం రాష్ట్రాల్లో కాంగ్రెస్ పార్టీ పూర్తిగా ఓటమి పాలైందన్నారు. ఒడిశాలో బీజేపీ ప్రభుత్వం ఏర్పాటు చేయబోతున్నదన్నారు. కేరళలోనూ బీజేపీ కార్యకర్తల త్యాగాలతో ఒక సీటు గెలుచుకున్నదని పేర్కొన్నారు. కేరళ బీజేపీ కార్యకర్తల త్యాగాలను, అంకిత భావాన్ని ప్రశంసించారు. సుదీర్ఘకాలంగా ఎన్నికల ప్రక్రియ నిర్వహించిన కేంద్ర ఎన్నికల సంఘానికి ధన్యవాదాలు తెలిపారు. భారత ఎన్నికల ప్రక్రియ, ఎన్నికల వ్యవస్థ, విశ్వసనీయత కలిగి ఉన్నందుకు ప్రతి భారతీయుడు గర్వ పడాలని వ్యాఖ్యానించారు. రాజ్యాంగం పట్ల ప్రజల విశ్వాసానికి లభించిన విజయం అని అభివర్ణించారు.