హైదరాబాద్, జూలై 9 (స్పెషల్ టాస్క్ బ్యూరో, నమస్తే తెలంగాణ): కొండెక్కిన కూరగాయల ధరలు మరింత పెరిగే అవకాశమున్నదని నిపుణులు చెబుతున్నారు. మొన్నటివరకూ వడగాడ్పులు, ఇప్పుడు కురుస్తున్న భారీ వర్షాలతో లక్షల ఎకరాల్లో పంట నష్టం జరిగినట్టు పేర్కొంటున్నారు. దీంతో విపణిలోకి కూరగాయల రాక తగ్గిపోతున్నదని గుర్తు చేస్తున్నారు.
ఫలితంగా రానున్న రోజుల్లో ఉల్లిగడ్డలు, టమాట, ఆలుగడ్డ వంటి కూరగాయల రేట్లు మరింత పెరుగొచ్చని అంచనా వేస్తున్నారు. కొంతమంది దళారులు గోదాముల్లో కూరగాయల నిల్వలను ఉంచుకొంటున్నారని, దీంతో కృత్రిమ కొరత ఏర్పడుతున్నదని చెబుతున్నారు. ప్రభుత్వం వెంటనే స్పందించి తగిన చర్యలు చేపట్టాలని విజ్ఞప్తి చేస్తున్నారు.