న్యూఢిల్లీ, జూన్ 4: దేశంలో ఎక్కడ, ఎప్పుడు ఎన్నికలు జరిగినా ఎగ్జిట్ పోల్స్ కోసం రాజకీయ నాయకులే కాదు, ప్రజలు కూడా ఆసక్తిగా ఎదురుచూస్తుంటారు. ఎగ్జిట్ పోల్స్ అంచనాలకు వాస్తవ ఫలితాలు అటూఇటుగా వచ్చే అవకాశం ఉండడంతో ముందే ఓ అంచనాకు వస్తారు. అయితే, ఈసారి మాత్రం ఎగ్జిట్ పోల్స్ అంచనాలు దారుణంగా దారితప్పాయి. ఏ ఎగ్జిట్ పోల్ అంచనా కూడా ఇండియా కూటమిని పెద్దగా లెక్కలోకి తీసుకోలేదు.
కానీ, వాస్తవ ఫలితాల్లో మాత్రం కాంగ్రెస్ కూటమి దూసుకెళ్తున్నది. ఏకంగా 230కిపైగా స్థానాల్లో ఆధిక్యంలోకి దూసుకెళ్లి బీజేపీ కూటమికి గట్టిపోటీ ఇచ్చింది. మరీ ముఖ్యంగా రాజస్థాన్, మహారాష్ట్ర, ఉత్తరప్రదేశ్లో ఊహకు అందని విధంగా సత్తాచాటింది. అధికార ఎన్డీయేకు 350కి పైగా వస్తాయన్న ఎగ్జిట్ పోల్ అంచనాలు తలకిందులయ్యాయి. రాజస్థాన్, హర్యానాలో కాంగ్రెస్ మళ్లీ పుంజుకున్నది. యూపీలో సమాజ్వాదీ పార్టీతో జతకట్టిన కాంగ్రెస్.. బీజేపీని రెండో స్థానానికి పరిమితం చేయడాన్ని ఎవరూ ఊహించలేకపోయారు.