Exam Hall | న్యూఢిల్లీ: పరీక్ష రాసే గదిలో సీలింగ్ ఎత్తు, ఉష్ణోగ్రత, గాలి నాణ్యత.. ఇవన్నీ ఆ గదిలో పరీక్ష రాస్తున్న విద్యార్థుల ప్రతిభను ప్రభావితం చేస్తున్నాయని తాజా అధ్యయనం ఒకటి తేల్చింది. సీలింగ్ ఎక్కువ ఎత్తులో ఉన్న గదిలో పరీక్ష రాసిన విద్యార్థులకు తక్కువ మార్కులు వచ్చినట్టు పరిశోధకులు గుర్తించారు. దక్షిణ ఆస్ట్రేలియా, డీకెన్ యూనివర్సిటీ పరిశోధకులు తాజా అధ్యయనం ప్రకారం, ‘పరీక్షల్లో మీరు ఎలా రాణిస్తారన్నది సబ్జెక్ట్పై అవగాహన, ప్రిపరేషన్పై ఆధారపడి ఉంటుంది.
చాలా కాలంగా అందరూ ఇదే వాస్తవమని నమ్ముతున్నారు. అయితే ఇది పూర్తి నిజం కాదు’ అని అధ్యయనం పేర్కొన్నది. ఆస్ట్రేలియా యూనివర్సిటీకి చెందిన 15,400 మంది గ్రాడ్యుయేట్ విద్యార్థుల ఫలితాల్ని (2011-2019 మధ్య) పరిశోధకులు విశ్లేషించి పై నివేదికను తయారుచేశారు. పరీక్ష గది సీలింగ్ ఎత్తుకు..అందులో పరీక్ష రాసిన విద్యార్థుల మార్కులకు ఉన్న సంబంధాన్ని పరిశీలించారు. సీలింగ్ ఎత్తు ఎక్కువగా ఉన్న గదుల్లో విద్యార్థులకు తక్కువ మార్కులు వచ్చినట్టు వారి పరిశీలనలో తేలింది.