Electoral Bonds | న్యూఢిల్లీ, మార్చి 15: రాజకీయ పార్టీలకు వచ్చే నిధులపై చాలా రోజులుగా విమర్శలు ఉన్నాయి. పార్టీలకు ఏ సంస్థలు నిధులు ఇస్తున్నాయి ? ప్రతిఫలంగా ఆ సంస్థలు ఆశిస్తున్న ప్రయోజనాలు ఏంటి ? అసలవి ఎలాంటి వ్యాపారం చేస్తాయి ? వాటిపై ఏమైనా ఆరోపణలు ఉన్నాయా ? వంటి వివరాలను రాజకీయ పార్టీలు పట్టించుకోవడం లేదనే ప్రధాన విమర్శ అన్ని పార్టీలపై ఉంది. ఇప్పుడు ఎస్బీఐ వెల్లడించిన ఎన్నికల బాండ్ల వివరాలను పరిశీలిస్తే విమర్శలకు బలం చేకూరుతున్నది. ఎలక్టోరల్ బాండ్లను కొని వివిధ రాజకీయ పార్టీలకు ఇచ్చిన సంస్థలపై పలు ఆరోపణలు ఉన్నాయి. ముఖ్యంగా 2019 నుంచి 2024 మధ్య ఎలక్టోరల్ బాండ్లు ఎక్కువగా కొనుగోలు చేసిన ఐదు సంస్థల్లో మూడింటిపైన ఈడీ, ఐటీ విచారణ జరుగుతున్నది.
ఫ్యూచర్ గేమింగ్ ఆండ్ హోటల్స్ ప్రైవేట్ లిమిటెడ్ అనే సంస్థ గత ఐదేండ్లలో అత్యధికంగా రూ.1,368 కోట్ల విలువైన ఎలక్టోరల్ బాండ్లను కొనుగోలు చేసింది. ఇప్పటివరకైతే ఈ బాండ్లను ఏ పార్టీకి ఇచ్చింది అనే వివరాలు వెల్లడి కాలేదు. అయితే, ఈ సంస్థ ప్రధానంగా లాటరీ వ్యాపారం చేస్తుంది. 2019లో ఈ సంస్థపై ఈడీ విచారణ ప్రారంభించింది. అదే ఏడాది జూలైలో సంస్థకు చెందిన రూ.250 కోట్ల ఆస్తులను ఈడీ అటాచ్ చేసింది. 2022 ఏప్రిల్ 2న మరో రూ.409.92 కోట్ల ఆస్తులనూ అటాచ్ చేసింది. ఇది జరిగిన ఐదు రోజులకే ఏప్రిల్ 7న ఈ సంస్థ రూ.100 కోట్ల విలువైన ఎన్నికల బాండ్లను కొనుగోలు చేసింది.
అత్యధికంగా ఎన్నికల బాండ్లను కొనుగోలు చేసిన జాబితాలో హైదరాబాద్కు చెందిన మౌలిక సదుపాయాల కల్పన సంస్థ మేఘా ఇంజినీరింగ్ సంస్థ కూడా ఉంది. ఈ సంస్థ 2019 నుంచి 2024 మధ్యకాలంలో రూ.966 కోట్ల విలువైన ఎన్నికల బాండ్లను కొనుగోలు చేసింది. ఈ సంస్థపై 2019 అక్టోబరులో ఐటీ దాడులు జరిగాయి. ఈడీ కూడా ఈ సంస్థపై విచారణ జరుపుతున్నది. ఇక, అత్యధికంగా ఎన్నికల బాండ్లు కొనుగోలు చేసిన ఐదో సంస్థ వేదాంత గ్రూప్. గనుల తవ్వకం నిర్వహించే ఈ సంస్థ రూ.376 కోట్ల విలువైన ఎన్నికల బాండ్లు కొనుగోలు చేసింది. 2019 ఏప్రిల్లో మొదటిసారిగా వేదాంత గ్రూప్ ఎన్నికల బాండ్లను కొనుగోలు చేయగా, అంతకు ముందు ఏడాది ఓ కేసులో ఈ సంస్థపై ఈడీ విచారణ జరిపింది.
దేశంలోని నల్ల ధనాన్ని తుడిచిపెట్టడానికే కేంద్రం ఎన్నికల బాండ్లను ప్రవేశపెట్టిందని, అయితే ఇప్పుడు ఈ పథకం రద్దుతో సమాజంలోకి నల్లధనం తిరిగి వస్తుందని ప్రజలు భయపడాలని హోం మంత్రి అమిత్ షా అన్నారు. ఎన్నికల బాండ్లను రద్దు చేయాలంటూ సుప్రీం కోర్టు తీర్పు ఇచ్చిన అనంతరం తొలిసారిగా షా దీనిపై స్పందించారు. సుప్రీం కోర్టు తీర్పుపై తానెలాంటి వ్యాఖ్యలు చేయదల్చుకోలేదని, అయితే ఎలక్టోరల్ బాండ్ల పథకం, నల్లధనం నిర్మూలనకు దానిని ఎలా ప్రవేశపెట్టింది చర్చించడానికి తాను సిద్ధంగా ఉన్నానని అన్నారు.