JKSSB SI Paper Leak Case | జమ్ముకశ్మీర్ సబ్ ఇన్స్పెక్టర్ నియామక పరీక్ష ప్రశ్నపత్రం (జేకేఎస్ఎస్బీ) లీక్ కేసులో ప్రధాన అనుమానితుడు యాతిన్ యాదవ్ (43)ను ఏడు రోజుల ఎన్ పోర్స్ మెంట్ డైరెక్టరేట్ రిమాండ్ విధిస్తూ జమ్ములోని దిగువ కోర్టు మంగళవారం ఆదేశాలు జారీ చేసింది. హవాలా లావాదేవీల నిరోధక చట్టం (పీఎంఎల్ఏ)లోని వివిధ సెక్షన్ల కింద ఆయనపై కేసు నమోదు చేసిన ఎన్ఫోర్స్మెంట్ డైరెక్టరేట్ (ఈడీ).. సోమవారం సాయంత్రం అరెస్ట్ చేసింది.
2022 మార్చి 27న జమ్ముకశ్మీర్లో సబ్ ఇన్స్పెక్టర్ల నియామక పరీక్ష జరిగింది. తదుపరి 1200 మంది అభ్యర్థుల జాబితా ఖరారు చేసింది జమ్ముకశ్మీర్ సర్వీస్ సెలెక్షన్ బోర్డు (జేకేఎస్ఎస్బీ). వీరితోపాటు 1300 మంది జూనియర్ ఇంజినీర్లు, 1000 మంది ఫైనాన్స్ అకౌంట్ అసిస్టెంటల పేర్లు ఖరారు చేసినా, పేపర్ లీక్తోపాటు అవకతవకలు జరిగాయని ఆరోపణలు రావడంతో ఈ పరీక్షను జమ్ముకశ్మీర్ అడ్మినిస్ట్రేషన్ గతేడాది జూలైలో రద్దు చేసింది. ఈ కేసు దర్యాప్తును కేంద్ర దర్యాప్తు సంస్థ (సీబీఐ)కి బదిలీ చేశారు. 2022 నవంబర్ 12న యాతిన్ యాదవ్తోపాటు 33 మంది నిందితులకు వ్యతిరేకంగా సీబీఐ చార్జిషీట్ దాఖలు చేసింది.
సీబీఐ కేసు ఆధారంగా ఎన్ఫోర్స్మెంట్ డైరెక్టరేట్ (ఈడీ) కేసు నమోదు చేసింది. తదనుగుణంగా ప్రత్యేక పబ్లిక్ ప్రాసిక్యూటర్ అశ్వనీ ఖజూరియా ద్వారా యాతిన్ యాదవ్ కస్టడీ కోరుతూ ఈడీ పిటిషన్ దాఖలు చేసింది. దీనిపై జమ్ములోని అవినీతి (సీబీఐ కేసులు) కేసుల ప్రత్యేక న్యాయస్థానం జడ్జి బాలజ్యోతి మంగళవారం విచారణ జరిపారు. యాతిన్ యాదవ్కు ఏడు రోజుల ఈడీ కస్టడీ విధిస్తూ ఆదేశాలు జారీ చేశారు. అంతకుముందు తమకు యాతిన్ యాదవ్ను 14 రోజుల ఈడీ కస్టడీ విధిస్తూ తమకు అప్పగించాలని కోరుతూ జమ్ము సబ్ జోనల్ ఆఫీస్ ఈడీ అసిస్టెంట్ డైరెక్టర్ రాహుల్ వర్మ కోర్టును ఆశ్రయించారు. సోమవారం సాయంత్రం అరెస్ట్ చేసిన యాతిన్ యాదవ్ను ఏడు రోజుల ఈడీ కస్టడీకి అప్పగిస్తూ న్యాయమూర్తి బాలజ్యోతి ఆదేశాలు జారీ చేశారు.
నీట్ యూజీ-2024, యూనివర్సిటీ గ్రాంట్స్ కమిషన్ (యూజీసీ) నిర్వహించిన నేషనల్ ఎలిజిబిలిటీ టెస్ట్ (యూజీసీ – నెట్) పరీక్షల్లో అవకతవకలు జరిగాయని, ప్రశ్నాపత్రాలు లీక్ అయ్యాయని ఆరోపణలు ఉన్న నేపథ్యంలో యాతిన్ యాదవ్ అరెస్ట్ కావడం గమనార్హం. నీట్ యూజీ 2024 ప్రశ్నపత్రాల లీక్, నిర్వహణలో అవకతవకలపై సీబీఐ కేసు నమోదు చేసిన సంగతి తెలిసిందే.
జమ్ముకశ్మీర్ సబ్ ఇన్స్పెక్టర్ నియామక పరీక్ష లీక్ చేసిన గ్యాంగ్లో యాతిన్ యాదవ్ ప్రధాన సూత్రధారి అని ఈడీ వర్గాలు చెబుతున్నాయి.యాతిన్ యాదవ్తోపాటు ఇతర నిందితులు ఈ పరీక్ష రాసిన అభ్యర్థులకు ప్రశ్నపత్రం లీక్ చేసేందుకు ఒక్కొక్కరి నుంచి రూ.15 లక్షల నుంచి రూ.30 లక్షల వరకూ వసూలు చేశారని ఆరోపణలు ఉన్నాయి. నగదు రూపంలోనే ముడుపులు వసూలు చేశారని, తర్వాత యాతిన్ యాదవ్ బ్యాంకు ఖాతాలకు మళ్లించారని ఈడీ వర్గాలు అనుమానిస్తున్నాయి. యాతిన్ యాదవ్ బ్యాంకు ఖాతాలను న్యూ గ్లోబల్ ఫమిగేషన్ కార్పొరేషన్, ఇతరులకు చెందిన రూ.1 కోటి విలువ గల ఆస్తులను ఈడీ ఇంతకుముందు జప్తు చేసింది.