న్యూఢిల్లీ: కేంద్ర హోం మంత్రి అమిత్ షా జిల్లాల కలెక్టర్లకు ఫోన్లు చేస్తున్నారని కాంగ్రెస్ ప్రధాన కార్యదర్శి జైరాం రమేశ్ చేసిన ఆరోపణలపై ఎన్నికల కమిషన్ (ఈసీ) స్పందించింది. జైరాం శనివారం ఇచ్చిన ట్వీట్ను పరిగణనలోకి తీసుకుని ఈ చర్యను చేపట్టింది. “పదవి నుంచి వైదొలగుతున్న హోం మంత్రి జిల్లాల డీఎంలు/కలెక్టర్లకు ఫోన్లు చేస్తున్నారు.
ఇప్పటి వరకు 150 మందికి ఫోన్ చేశారు. ఇది బాహాటంగా బెదిరించడమే. దీన్ని బట్టి బీజేపీ ఎంత నైరాశ్యంలో ఉందో వెల్లడవుతున్నది” అని జైరాం ట్వీట్ చేశారు. అమిత్ షా జిల్లాల కలెక్టర్లకు ఫోన్లు చేసినట్లు తెలిపే సమాచారాన్ని ఆదివారం సాయంత్రం 7 గంటలలోగా తమకు సమర్పించాలని జైరాంను ఈసీ ఆదేశించింది. ఈ సమాచారం ఇస్తే, తగిన చర్యలు తీసుకుంటామని తెలిపింది.