న్యూఢిల్లీ, జూన్ 6: ఆధార్ సేవలు పొందేందుకు ఇకపై కార్యాలయాల చుట్టూ తిరగాల్సిన పనిలేదు. త్వరలోనే ఇంటివద్దనే ఆధార్ సేవలను అందించనున్నారు. భారత విశిష్ట గుర్తింపు ప్రాధికార సంస్థ (యూఐడీఏఐ) ఈ మేరకు చర్యలు తీసుకుంటున్నది. భారత తపాలా చెల్లింపు బ్యాంకు (ఇండియా పోస్ట్ పేమెంట్ బ్యాంకు)కు చెందిన 48 వేల మంది పోస్టుమ్యాన్లకు శిక్షణ అందిస్తున్నది. ఆధార్తో ఫోన్ నంబర్, పాన్ నంబర్ అనుసంధానం, వివరాల అప్డేట్, చిన్న పిల్లలకు ఆధార్ కార్డు పొందడం వంటి సేవలను ఇంటి దగ్గరే పొందొచ్చు.
జిల్లాకో ఆధార్ సేవా కేంద్రం..
రెండో విడుతలో మొత్తం 1.5 లక్షల మంది తపాలా సిబ్బందికి శిక్షణ అందించాలని నిర్ణయించినట్లు ఓ అధికారి వెల్లడించారు. దేశంలోని 755 జిల్లాల్లో జిల్లాకో ఆధార్ సేవా కేంద్రం ఏర్పాటు చేసేందుకు యూఐడీఏఐ ప్రణాళికలు రూపొందిస్తున్నదని తెలిపారు. అలాగే దేశంలోని 7,224 బ్లాకుల్లో మినీ ఆధార్ సేవా కేంద్రాలు కూడా ఏర్పాటు చేయాలని భావిస్తున్నట్లు చెప్పారు.