న్యూఢిల్లీ: దేశ ఆర్థిక వ్యవస్థకు ఆయువుపట్టుగా ఉన్న అసంఘటిత రంగం 2016 నుంచి దారుణంగా దెబ్బతిన్నదని ఇండియా రేటింగ్ అండ్ రిసెర్చ్ సంస్థ చేసిన ఒక అధ్యయనంలో వెల్లడైంది. కేంద్ర ప్రభుత్వం పెద్ద నోట్లను రద్దు చేయడంతో ఈ రంగంలో పతనం మొదలయ్యిందని, జీఎస్టీ అమలుతో ఇది మరింత తీవ్రమైందని పేర్కొన్నది. కొవిడ్ మహమ్మారి ఈ రంగాన్ని కోలుకోలేని దెబ్బ తీసిందని తెలిపింది. ఫలితంగా దేశ ఆర్థిక వ్యవస్థకు రూ.11.3 లక్షల కోట్ల నష్టం వాటిల్లిందని పేర్కొన్నది. అసంఘటిత రంగంలో 63 లక్షల సంస్థలు మూతబడ్డాయని, ఫలితంగా 1.6 కోట్ల మంది ఉద్యోగాలు పోయాయని వెల్లడించింది.
పెద్ద నోట్ల రద్దుతో మొదలు
పన్నుల పరిధిలో ఉండని వీధి వ్యాపారాలు వంటి వాటిని అసంఘటిత రంగంగా చూస్తారు. దేశ గ్రాస్ వాల్యూ యాడెడ్(జీవీఏ)లో దీని వాటా దాదాపు 44 శాతంగా ఉంటుంది. అయితే, 2016లో పెద్ద నోట్ల రద్దు నుంచి ఈ రంగంలో ఒడిదొడుకులు మొదలయ్యాయి. జీఎస్టీ అమలు చేయడం, కొవిడ్ ప్రభావంతో ఈ రంగం వరుస దెబ్బలు తిన్నది. ఫలితంగా 2015-16 నుంచి 2022-23 వరకు దాదాపు 63 లక్షల చిరు వ్యాపారాలు మూతబడి 1.6 కోట్ల ఉద్యోగాలు పోయాయని నివేదిక తెలిపింది.