న్యూఢిల్లీ, ఏప్రిల్ 28: లోక్సభ ఎన్నికల వేళ కాంగ్రెస్ పార్టీకి గట్టి ఎదురుదెబ్బ తగిలింది. ఢిల్లీ కాంగ్రెస్లో పొత్తు మంటలు రేగాయి. ఆమ్ ఆద్మీ పార్టీతో పొత్తును వ్యతిరేకిస్తున్న ఢిల్లీ పీసీసీ అధ్యక్షుడు అర్వింద్ సింగ్ లవ్లీ రాజీనామా చేశారు. ఈ మేరకు ఏఐసీసీ అధ్యక్షుడు ఖర్గేకు రాజీనామా లేఖ పంపారు. కాంగ్రెస్పై తప్పుడు, అబద్ధపు, అవినీతి ఆరోపణలు చేసి ఆప్ అధికారంలోకి వచ్చిందని, ఆ పార్టీతో పొత్తు ఢిల్లీ కాంగ్రెస్ నేతలెవరికీ ఇష్టం లేదని అర్వింద్ పేర్కొన్నారు. అయినా కాంగ్రెస్ అధిష్ఠానం ఆ పార్టీతో పొత్తు పెట్టుకోవడాన్ని తప్పుబట్టారు. ఢిల్లీ ఏఐసీసీ ఇంఛార్జి దీపక్ బబ్రియా వైఖరి సరిగా లేదని, ఢిల్లీ శాఖలోని పార్టీ సీనియర్లు తీసుకున్న ఏకగ్రీవ నిర్ణయాలను కూడా ఆయన ఏకపక్షంగా పక్కకు పెట్టేశారని లవ్లీ ఆరోపించారు. పార్టీ కార్యకర్తల అభిప్రాయాలను కాపాడలేనప్పుడు, తాను పీసీసీ అధ్యక్ష పదవిలో ఉండలేనని పేర్కొన్నారు. దీపక్ బబ్రియాతో పొసగక ఇటీవలే మాజీ మంత్రి, ఏఐసీసీ సభ్యుడు రాజ్కుమార్ చౌహాన్ కూడా రాజీనామా చేశారు.
బీజేపీ అభ్యర్థిగా లవ్లీ ?
అర్విందర్ సింగ్ లవ్లీని తూర్పు ఢిల్లీ స్థానం నుంచి హర్ష్ మల్హోత్రాకు బదులుగా బీజేపీ పోటీకి నిలపనున్నట్టు కాంగ్రెస్ మాజీ ఎమ్మెల్యే ఆసిఫ్ మహమ్మద్ ఖాన్ ఆరోపించారు. తన రాజీనామా లేఖలో ఆయన ఆప్పై, కేజ్రీవాల్పై విమర్శలు గుప్పించడం, అవినీతి ఆరోపణలు చేయడంతో ఇది నిజమేననే అనుమానాలు మొదలయ్యాయి. అయితే, తాను కేవలం ఢిల్లీ పీసీసీ అధ్యక్ష పదవికి మాత్రమే రాజీనామా చేశానని, తాను ఏ పార్టీలోనూ చేరడం లేదని లవ్లీ పేర్కొన్నారు.