న్యూఢిల్లీ: అతడో ఘరానా విమాన దొంగ.కేబిన్ బ్యాగ్లో ఉంచిన ప్రయాణికుల లగేజ్ పక్కన తన బ్యాగ్ ఉంచి నైపుణ్యంగా చోరీలకు పాల్పడే వాడు. ఒకటి కాదు రెండు కాదు గత ఏడాది 100 రోజుల పాటు అలా 200 విమానాల్లో వేలాది కిలోమీటర్ల దూరం ప్రయాణించి నూతన తరహాలో యథేచ్ఛగా చోరీలు చేసిన రాజేశ్ కుమార్ అనే నిందితుడు ఎట్టకేలకు ఢిల్లీ పోలీసులకు చిక్కాడు. నిందితుడి ఇంటి నుంచి పెద్దయెత్తున బంగారం, వెండి స్వాధీనం చేసుకున్నారు. నిందితుడికి ఢిల్లీ రైల్వే స్టేషన్ సమీపంలో రిక్కీ డీలక్స్ అనే మూడంతస్తుల గెస్ట్ హౌస్, రెండు వ్యాపారాలు ఉన్నట్టు గుర్తించారు. కేసు వివరాల్లోకి వెళితే.. హైదరాబాద్ నుంచి ఢిల్లీకి విమానంలో ప్రయాణం చేసిన ఒక మహిళ తన హ్యాండ్ బ్యాగ్లోని ఏడు లక్షల విలువైన నగలు, అమెరికా నుంచి వచ్చిన ఒక వ్యక్తి తన కేబిన్ బ్యాగ్ నుంచి 20 లక్షల విలువైన వస్తువులు అపహరణకు గురైనట్టు పోలీసులకు ఫిర్యాదు చేశారు. దీంతో పోలీసులు పలు ఫుటేజీలు పరిశీలించి రాజేశ్ కపూర్ అనే వ్యక్తిని అదుపులోకి తీసుకుని ప్రశ్నించగా, తన నేరాలు ఒప్పుకున్నాడు. సాధారణంగా కనెక్టింగ్ ఫ్లయిట్లను ఎక్కేవారి వద్ద పెద్దమొత్తంలో నగలు, ఖరీదైన వస్తువులు ఉంటాయని, అందుకే అవి ఎక్కే వృద్ధులు, మహిళలను టార్గెట్గా చేసుకునేవాడినని నిందితుడు తెలిపాడు. గతంలో రైళ్లలో ఇలాగే దొంగతనాలు చేసేవాడని పోలీసులు తెలిపారు.