Doctor Priya : విమానాశ్రయంలో గుండెపోటుతో కుప్పకూలిన ఓ వృద్ధుడిని అక్కడే ఉన్న వైద్యురాలు సీపీఆర్ చేసి కాపాడారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్గా మారింది. వృద్ధుడిని కాపాడిన వైద్యురాలిని నెటిజన్ పొగడ్తల్లో ముంచెత్తుతున్నారు.
వివరాల్లోకి వెళ్తే.. ఓ 60 ఏళ్ల వృద్ధుడు మరో పట్టణానికి వెళ్లేందుకు ఇందిరాగాంధీ అంతర్జాతీయ విమానాశ్రయానికి వచ్చాడు. అయితే అప్పుడే ఆయనకు గుండెనొప్పి రావడంతో కుప్పకూలిపోయాడు. అక్కడే ఉన్న ప్రియ అనే వైద్యురాలు ఇది గమనించి ఆ వృద్ధుడికి సీపీఆర్ చేయడం మొదలుపెట్టారు.
దాదాపు ఐదు నిమిషాలపాటు ఆపకుండా సీపీఆర్ చేసి ఆ వృద్ధుడి ప్రాణాలు కాపాడారు. ఈ నెల 17న జరిగిన ఈ ఘటనకు సంబంధించిన వీడియో ఇవాళ సోషల్ మీడియాలో వైరల్గా మారింది. కింది వీడియోలో వృద్ధుడికి డాక్టర్ ప్రియ సీపీఆర్ చేసిన దృశ్యాలను మీరు కూడా చూడవచ్చు.
Today at T2 Delhi Airport, a gentleman in his late 60s had a heart attack in the food court area.
This lady Doctor revived him in 5 mins.
Super proud of Indian doctors.
Please share this so that she can be acknowledged. pic.twitter.com/pLXBMbWIV4
— Rishi Bagree (@rishibagree) July 17, 2024
ఈ ఘటనపై డాక్టర్ ప్రియ మాట్లాడుతూ.. ‘ముందుగా చెప్పాల్సింది ఏమిటంటే భగవంతుడి స్థానాన్ని ఎవరూ భర్తీ చేయలేరు. మనం కేవలం దేవుడి ప్రతినిధులం మాత్రమే. మనం ఏంచేసిన ఆయన ఆజ్ఞతోనే చేయగలుగుతాం. మేం అమర్నాథ్ యాత్రకు వెళ్లి తిరిగివస్తుండగా మా విమానం 2.30 గంటలు ఆలస్యంగా ఢిల్లీకి చేరుకుంది. మా పక్కనే ఓ స్టాల్ దగ్గర నిలబడిన ఒక పెద్దాయన ఒక్కసారిగా కుప్పకూలిపోయారు. మేం వెంటనే ఆయన దగ్గరికి పరుగెత్తాం. అప్పుడు నా వెంట నా భర్త డాక్టర్ రమాకాంత్ గోయెల్, మరో డాక్టర్ దంపతులు ఉమేశ్ గోయెల్, డాలీ గోయెల్ ఉన్నారు’ అని తెలిపారు.
‘మేం వెళ్లేసరికి వృద్ధుడు స్పృహ లేకుండా పడి ఉన్నాడు. శ్వాస తీసుకోవడం లేదు. దాంతో మేం వెంటనే సీపీఆర్ చేయడం ప్రారంభించాం. ఒక ఐదు నిమిషాల తర్వాత వృద్ధుడికి స్పృహ వచ్చింది. శ్వాస తీసుకోవడం మొదలైంది. కాసేపటికే ఆయనలో పల్స్ స్టార్ట్ అయ్యింది. ఆ తర్వాత ఎయిర్పోర్టు సిబ్బంది వచ్చి ఆయనను ఆస్పత్రికి తరలించారు’ అని డాక్టర్ ప్రియ తెలిపారు.