న్యూఢిల్లీ, జూన్ 2: తన మధ్యంతర బెయిల్ గడువు ముగియడంతో ఢిల్లీ ముఖ్యమంత్రి అరవింద్ కేజ్రీవాల్ ఆదివారం తీహార్ జైలులో లొంగిపోయారు. ఢిల్లీ మద్యం పాలసీ కేసులో అరస్టై తీహార్ జైలులో ఉన్న కేజ్రీవాల్ ఎన్నికల ప్రచారం చేసుకోవడానికి అనుమతినిస్తూ సుప్రీం కోర్టు మధ్యంతర బెయిల్ ఇవ్వడంతో ఆయన లోక్సభ ఎన్నికల ప్రచారంలో విస్తృతంగా పాల్గొన్నారు.
బెయిల్ గడువు జూన్ 2కు ముగియడంతో ఆయన తీహార్ జైలుకు వచ్చారు. లొంగిపోవడానకి ముందు ఆయన గాంధీ స్మతివనం రాజ్ఘాట్లో నివాళి అర్పించారు. కన్నాట్ ప్లేస్లోని హనుమాన్ దేవాలయంలో ప్రార్థనలు చేశారు. ‘నేను జైలుకు తిరిగి వెళ్తున్నాను.. అయితే అది అవినితి చేసినందుకు కాదు.. నియంతృత్వంపై గళం ఎత్తినందుకు’ అని అన్నారు.
‘సుప్రీం కోర్టు నాకు 21 రోజులు బెయిల్ ఇచ్చింది. నిజంగా అవి మరచిపోలేని రోజులు. ఒక్క నిమిషం కూడా వాటిని వృథా చేయలేదు. దేశాన్ని రక్షించడం కోసం ప్రచారం నిర్వహించా. ఆప్ నాకు ముఖ్యం కాదు, నా మొదటి ప్రాధాన్యత దేశానికే, తర్వాతే ఆప్’ అని ఆయన పేర్కొన్నారు. కేజ్రీవాల్ భార్య సునీత కేజ్రీవాల్, ఆప్ నేతలు ఆయన వెంట వచ్చారు.