Temperature | ఢిల్లీ, జూన్ 1: దేశంలో ఎండలు మండిపోతున్నాయి. అన్ని రాష్ర్టాల్లో ఉష్ణోగ్రతలు ఎక్కువగా నమోదవుతున్నాయి. అయితే, ఇటీవల ఢిల్లీ, నాగ్పూర్లో మాత్రం అసాధారణ రీతిలో ఉష్ణోగ్రతలు రికార్డయ్యాయి. మే 29న ఢిల్లీలోని మంగేశ్పూర్లో ఏకంగా 52.9 డిగ్రీల సెల్సియస్ ఉష్ణోగ్రత నమోదయ్యింది. ఇది దేశచరిత్రలోనే అత్యధిక ఉష్ణోగ్రతగా అంతా భావించారు. అయితే, మరునాడే ఈ రికార్డును బ్రేక్ చేస్తూ గురువారం నాగ్పూర్లోని అంబాజరీ రోడ్డులో 56 డిగ్రీలు, సోనేగావ్లో 54 డిగ్రీల ఉష్ణోగ్రతలు నమోదయ్యాయి. ప్రపంచంలో ఎక్కడా లేని విధంగా ఇలా అసాధారణ స్థాయిలో ఉష్ణోగ్రతలు నమోదు కావడాన్ని వాతావరణ విభాగం సైతం అనుమానించి విచారణ జరిపింది.
సెన్సార్లలో లోపాల వల్లనే ఇలా అధిక ఉష్ణోగ్రతలు రికార్డయినట్టు గుర్తించింది. నాగ్పూర్లో నాలుగు ఆటోమెటిక్ వెదర్ స్టేషన్లను ఏర్పాటు చేయగా సోనేగావ్, అంబాజరీ రోడ్డులో అసాధారణ ఉష్ణోగ్రతలు రికార్డయ్యాయని, మిగతా రెండు స్టేషన్లలో మాత్రం 44 డిగ్రీలు నమోదైనట్టు భారత వాతావరణ విభాగం వెల్లడించింది. రెండు కేంద్రాల్లో సెన్సార్ సరిగ్గా పని చేయకపోవడం వల్లనే తప్పుగా ఉష్ణోగ్రతలు రికార్డయ్యాయని తెలిపింది. మరోవైపు ఢిల్లీలోని మంగేశ్పూర్లో కూడా 52.9 డిగ్రీల ఉష్ణోగ్రత తప్పుగా నమోదైందని కేంద్రమంత్రి కిరణ్ రిజుజు తెలిపారు. సెన్సార్ లోపం వల్ల 3 డిగ్రీలు ఎక్కువ ఉష్ణోగ్రత రికార్డయినట్టు వెల్లడించారు.