Agnipath | గ్వాలియర్: దేశంలో ఇప్పటికే నీట్, నెట్ పేపర్ లీక్లపై తీవ్ర దుమారం రేగుతున్న వేళ.. సాయుధ బలగాల్లో నియామకాల కోసం కేంద్రం తీసుకొచ్చిన అగ్నిపథ పథకంలోనూ అక్రమాలు చోటుచేసుకున్నాయన్న ఆరోపణలు వెల్లువెత్తుతున్నాయి. 2022, సెప్టెంబర్-నవంబర్లో మధ్యప్రదేశ్లోని జబల్పూర్లో నిర్వహించిన అగ్నివీర్ రిక్రూట్మెంట్ పరీక్షలో అక్రమాలు జరిగాయనే ఆరోపణలు వస్తున్నాయి.
కటాఫ్ కంటే తక్కువ మార్కులు వచ్చిన అభ్యర్థుల పేర్లు మెరిట్ జాబితాలో కనిపించాయని కొంత మంది అభ్యర్థులు ఆరోపిస్తున్నారు. ఈ పరిణామాల నేపథ్యంలో రిక్రూట్మెంట్ ర్యాలీ సందర్భంగా ఎంపిక చేసిన అభ్యర్థులందరి మార్కుల వివరాలు వెల్లడించాలని మధ్యప్రదేశ్ హైకోర్టు ఇటీవల ఆర్మీకి ఆదేశాలు జారీచేసింది. ఈ మొత్తం వ్యవహారంపై ఇన్వెస్టిగేషన్ చేసిన ‘ది వైర్’ తాజా కథనంలో కీలక విషయాలను వెల్లడించింది.
ఫలితాలపై తీరుపై పలువురు అభ్యర్థులు హైకోర్టులో పిటిషన్లు వేశారు. తమకు వచ్చిన మార్కులు, కటాఫ్ స్కోర్, ఇతర అభ్యర్థులకు వచ్చిన మార్కుల వివరాలు తెలియజేయాలని కోరుతూ ఆర్మీకి ఆర్టీఐ కింద దరఖాస్తు చేశారు. 169గా నిర్ణయించిన కటాఫ్ కంటే తక్కువ స్కోర్ 159 వచ్చిన నితీశ్ కుమార్ అనే అభ్యర్థి పేరు ఎంపికైన వారి జాబితాలో కనిపించింది. ఆర్మీ వెబ్సైట్లో అందుబాటులో ఉంచిన సెలెక్ట్ అయిన అభ్యర్థుల లిస్టులో అతని రోల్ నంబర్ కనిపించింది. పలువురు అభ్యర్థులు హైకోర్టును ఆశ్రయించిన నేపథ్యంలో నితీశ్ కుమార్ పేరును లిస్టు నుంచి తర్వాత తొలగించారని పేర్కొన్నారు.