Chandipura virus : గుజరాత్ (Gujarat) లో చాందిపుర వైరస్ (Chandipura virus) కలకలం రేపుతున్నది. ఆ వైరస్ బారినపడి ఇప్పటికే సబర్కాంతా జిల్లాలో ఒక చిన్నారి మరణించాడు. తాజాగా వడోదర జిల్లాలో మరో మరణం సంభవించింది. దాంతో వడోదర జిల్లాలో తొలి మరణం, గుజరాత్లో రెండో మరణం సంభవించినట్లయ్యింది.
ఇటీవల అస్వస్థతకు గురైన ఆరేళ్ల బాలుడిని ఎస్ఎస్జీ ఆస్పత్రిలో చేర్పించగా పరిస్థితి విషమించి కేవలం 10 గంటల వ్యవధిలోనే ప్రాణాలు కోల్పోయాడు. ఆ తర్వాత ఆ బాలుడి వైద్య పరీక్షల రిపోర్టులో చాందిపుర వైరస్ సోకినట్లు తేలింది. గత కొన్ని రోజులుగా గుజరాత్లో చాందిపుర వైరస్ కేసులు నమోదవుతున్నాయి.
హిమ్మత్నగర్ జిల్లా కేంద్రంలోని సివిల్ ఆస్పత్రిలో పలువురు చిన్నారులకు చికిత్స జరుగుతోంది. చాందిపురా వైరస్ కేసుల్లో జ్వరం లక్షణాలు కనిపిస్తాయి. ఆ వైరస్ సోకిన వారికి ఫ్లూ లాంటి లక్షణాలు కూడా ఉంటాయి. తీవ్ర స్థాయి ఎన్సెఫలైటిస్ కూడా వస్తుంది. దోమలు, పురుగుల ద్వారా ఆ వైరస్ వ్యాప్తి చెందుతుంది.