న్యూఢిల్లీ, జూలై 23: పెరిగిన రెవెన్యూ వసూళ్లతో వచ్చిన ఉత్సాహం నేపథ్యంలో ఈ ఆర్థిక సంవత్సరాని (2024-25)కి దేశ జీడీపీలో ద్రవ్యలోటును 4.9 శాతానికే కట్టడి చేయాలన్న లక్ష్యాన్ని పెట్టుకున్నది కేంద్ర ప్రభుత్వం. ఈ ఏడాది ఫిబ్రవరి 1న ప్రకటించిన మధ్యంతర బడ్జెట్లో ఇది 5.1 శాతంగా ఉన్నది. కాగా, వచ్చే ఆర్థిక సంవత్సరం (2025-26)లో ద్రవ్యలోటును 4.5 శాతానికే పరిమితం చేయాలని మోదీ సర్కారు చూస్తున్నది.
ఇక ప్రస్తుత ఆర్థిక సంవత్సరంలో అప్పులు కాకుండా మొత్తం ఆదాయం రూ.32.07 లక్షల కోట్లుగా ఉండొచ్చని బడ్జెట్లో అంచనా వేశారు. అలాగే మొత్తం ఖర్చుల్ని రూ.48.21 లక్షల కోట్లుగా అంచనా వేశారు. అలాగే నికర పన్ను వసూళ్లు రూ.25.83 లక్షల కోట్లుగా ఉండొచ్చని చెప్తున్నారు.