లక్నో: ఒక యువకుడు కాళికా దేవి వేషం వేశాడు. కత్తి చేతపట్టిన అతడు రాక్షసుడి పాత్ర పోషించిన బాలుడి గొంతు కోసి హత్య చేశాడు. ఇది చూసి అక్కడి వారు షాక్ అయ్యారు. (teen slits child’s throat) ఉత్తర ప్రదేశ్లోని కాన్పూర్ జిల్లాలో ఈ సంఘటన జరిగింది. బంభియాన్పూర్ గ్రామంలోని సుభాష్ సైనీ ఇంట్లో బుధవారం భాగవత కథా కార్యక్రమాన్ని నిర్వహించారు. ఈ సందర్భంగా పిల్లలు పలు దేవతల వేషధారణలో నటించారు. అయితే కాళికా దేవి పాత్ర పోషించిన 14 ఏళ్ల బాలుడు ఉన్నట్టుండి చేతిలోని కత్తితో రాక్షసుడి వేషం వేసిన 11 ఏళ్ల బాలుడి గొంతు కోశాడు. ఆ బాలుడ్ని వెంటనే ఆసుపత్రికి తరలించగా అప్పటికే మరణించినట్లు డాక్టర్లు తెలిపారు.
కాగా, ఈ విషయం తెలిసిన వెంటనే పోలీసులు సంఘటనా స్థలానికి చేరుకున్నారు. బాలుడి మృతదేహాన్ని పోస్ట్మార్టం కోసం ఆసుపత్రికి తరలించారు. నిందితుడైన 14 ఏళ్ల బాలుడ్ని అదుపులోకి తీసుకున్నారు. అతడ్ని ప్రశ్నించిన తర్వాత జువెనైల్ కోర్టులో ప్రవేశపెడతామని పోలీసులు వెల్లడించారు.
మరోవైపు రాక్షసుడి ప్రాతలో ఉన్న బాలుడ్ని బెదిరించేందుకు త్రిశూలం వినియోగించాలని కాళీ వేషం వేసిన బాలుడికి సూచించినట్లు గ్రామస్తులు తెలిపారు. అయితే త్రిశూలం లభించకపోవడంతో పదునైన కత్తిని అతడు తీసుకువచ్చినట్లు పోలీసులకు చెప్పారు.