Bombay HC : మహారాష్ట్రలోని పుణె సిటీలో పోర్షే కారుతో ఇద్దరిని గుద్దిచంపిన మైనర్ నిందితుడికి బాంబే హైకోర్టు బెయిల్ మంజూరు చేసింది. అతడికి రిమాండ్ విధించడం చట్టవిరుద్ధమని వ్యాఖ్యానించింది. బాలుడి వయసును పరిగణలోకి తీసుకోకుండా జువైనల్ జస్టిస్ బోర్డు అతడిని రిమాండ్కు పంపిందని పేర్కొంది. అబ్జర్వేషన్ హోమ్లో ఉన్న అతడిని వెంటనే విడుదల చేయాలని ఆదేశించింది.
మైనర్ నిందితుడు గత నెల 19న తాగిన మైకంలో కారును ప్రమాదకరంగా నడిపి ఓ బైకును ఢీకొట్టాడు. పుణెలోని కళ్యాణ్ నగర్ ఏరియాలో ఈ ఘటన జరిగింది. ఆ ప్రమాదంలో బైకుపై వెళ్తున్న ఇద్దరు సాఫ్ట్వేర్ ఇంజినీర్లు అక్కడికక్కడే ప్రాణాలు కోల్పోయారు. నిందితుడు దెబ్బతిన్న తన కారును అక్కడే వదిలేసి పారిపోయాడు. అతడి తండ్రి విశాల్ అగర్వాల్ పలుకుబడి ఉన్న వ్యక్తి కావడంతో ముందుగా అరెస్ట్ చేయలేదు.
తర్వాత అరెస్ట్ చేసి జువైనల్ జస్టిస్ బోర్డు ముందు హజరుపర్చగా 300 పదాల ఎస్సే రాయించి వదిలేసింది. దాంతో జనం నుంచి తీవ్ర విమర్శలు వచ్చాయి. దాంతో అతడిని మళ్లీ బోర్డు ముందు హాజరుపర్చగా రిమాండ్ విధించింది. బ్లడ్ శాంపిల్స్ను మార్చి నిందితుడిని కేసు నుంచి బయటపడేందుకు ప్రయత్నించిన కేసులో అతడి తల్లిదండ్రులు, తాత కూడా అరెస్టయ్యారు. ప్రస్తుతం వాళ్లు జైల్లోనే ఉన్నారు.
ఈ క్రమంలో బాలుడు ఆంటీ అతడి బెయిల్ కోసం బాంబే హైకోర్టును ఆశ్రయించింది. వయసును దృష్టిలో పెట్టుకుని అతడికి బెయిల్ ఇవ్వాలని తన పిటిషన్లో కోరింది. మంగళవారం ఆ పిటిషన్పై విచారణ జరిపిన బాంబే హైకోర్టు తాజా ఆదేశాలు ఇచ్చింది. పేరెంట్స్ విడుదలయ్యే వరకు బాలుడు పిటిషనర్ (బాలుడి ఆంటీ) కస్టడీలోనే ఉంటాడని పేర్కొంది.