న్యూఢిల్లీ: దేశంలోని పలు నగరాల స్కూళ్లు, హాస్పిటల్స్కు బాంబు బెదిరింపులు వస్తున్నాయి. తాజాగా సోమవారం రెండు రాష్ట్రాల్లో 40కుపైగా స్కూళ్లకు బాంబు బెదిరింపులు వచ్చాయి. (Bomb threats to schools) దీంతో పోలీసులు అప్రమత్తమయ్యారు. బాంబ్ డిస్పోజల్, డాగ్ స్క్వాడ్లలతో తనిఖీలు చేపట్టారు. రాజస్థాన్ రాజధాని జైపూర్లోని సుమారు 37 పాఠశాలలకు సోమవారం బాంబు బెదిరింపులు వచ్చాయి. ఆయా స్కూళ్లకు బెదిరింపు ఈ మెయిల్స్ వచ్చినట్లు పోలీసులకు సమాచారం అందింది. దీంతో ఆయా స్కూళ్లలోని విద్యార్థులు, సిబ్బందిని ఇంటికి పంపివేశారు. బాంబ్ డిస్పోజల్ స్క్వాడ్లు, స్నిఫర్ డాగ్స్తో సోదాలు చేశారు. అయితే ఎలాంటి అనుమానాస్పద వస్తువులు కనిపించలేదని పోలీస్ అధికారి తెలిపారు. బాంబు బెదిరింపు ఈమెయిల్స్పై దర్యాప్తు చేస్తున్నట్లు చెప్పారు.
మరోవైపు ఉత్తరప్రదేశ్ రాజధాని లక్నోలోని నాలుగు స్కూళ్లకు కూడా సోమవారం బాంబు బెదిరింపులు వచ్చాయి. ఇక్కడి పాఠశాలలకు కూడా ఈమెయిల్ ద్వారా బాంబు బెదిరింపు వచ్చినట్లు పోలీసులు తెలిపారు. విద్యార్థులను వెంటనే ఖాళీ చేయించి క్షుణ్ణంగా తనిఖీలు నిర్వహించినట్లు చెప్పారు. ఒకే మెయిల్ అడ్రస్ నుంచి వచ్చిన బాంబు బెదిరింపు ఈమెయిల్స్పై సైబర్ టీమ్, ఏటీఎస్ బృందాలు దర్యాప్తు చేస్తున్నాయని పోలీస్ అధికారి వెల్లడించారు.