BJP | హైదరాబాద్, మే 30 (స్పెషల్ టాస్క్ బ్యూరో, నమస్తే తెలంగాణ): ‘ఈసారి 400కు పైగా సీట్లు సాధించి హ్యాట్రిక్ విజయాన్ని సాధించబోతున్నామం’టూ తొలి దఫా పోలింగ్ కంటే ముందు ధీమాగా చెప్పిన ప్రధాని మోదీ చివరి దఫాకు వచ్చే సరికి తీవ్ర ఒత్తిడికి గురయ్యారు. పోలింగ్కు ముందు ఉన్న ఉత్సాహం.. ఆ తర్వాత మోదీ సహా బీజేపీ నేతల్లో నీరుగారిపోయింది. 543 స్థానాలకు ఏడు విడుతల్లో 43 రోజుల వ్యవధిలో సుదీర్ఘ పోలింగ్ నిర్వహణ తమకు కలిసొస్తుందని భావించిన మోదీ పరివారానికి అది బెడిసికొట్టడం తీవ్ర షాక్కు గురిచేసింది. అందుకే మోదీ విసుగ్గా ఉన్నారని విశ్లేషకులు అభిప్రాయపడుతున్నారు.
ఏడు దఫాల్లో నెలన్నర పాటు పోలింగ్ జరిగితే తమకు లాభిస్తుందనుకొన్న బీజేపీ అంచనాలు చివరకు తలకిందులయ్యాయి. ఒక్కో విడుత మధ్య సుమారు వారంపాటు వ్యవధి ఉండటంతో ధరలు, నిరుద్యోగం వంటి సమస్యలను విపక్షాలు ప్రజల్లోకి బలంగా తీసుకువెళ్లగలిగాయి. దీంతో అధికార పక్షం ఆత్మరక్షణలో పడింది. ఒకవిధంగా బీజేపీ క్రమంగా నీరుగారిపోతే.. విపక్షాలు పుంజుకొన్నాయి. దీంతో 400పైగా సీట్లు వస్తాయంటూ తొలుత ప్రచారం చేసిన బీజేపీకి మెజార్టీ సీట్లు వచ్చే అవకాశాలు కూడా మృగ్యమయ్యాయి. ఇక, విజయావకాశాలపై దెబ్బ పడకూడదని బీజేపీ పెద్దయెత్తున సిట్టింగ్లకు టికెట్లను నిరాకరించింది. 130కు పైగా సీట్లలో కొత్తవారినే ఎంపిక చేసింది. సిట్టింగ్లపై ఉన్న వ్యతిరేకత.. ఫలితాలపై ప్రభావం చూపించవచ్చన్న కారణంతోనే వీరిని బీజేపీ తప్పించినట్టు రాజకీయ విశ్లేషకులు చెబుతున్నారు. గడిచిన మూడు దశాబ్దాల్లో తొలిసారిగా కశ్మీర్లో బీజేపీ పోటీకి దూరంగా ఉండటం గమనార్హం.
ఎన్నికల ప్రచారంలో మోదీ చేసిన ప్రసంగాల్లో అసహనం, విద్వేషం కనిపించడం అందర్నీ ఆశ్చర్యానికి గురిచేసింది. ‘కాంగ్రెస్ మన తల్లులు, చెల్లెళ్ల మంగళ సూత్రాలను కూడా వదలదు’ అని ఒకసారి.. ‘దేశ సంపదనంతా చొరబాటుదారులకు, ఎక్కువ మంది పిల్లలు ఉన్నవారికి (ముస్లింలకు) కాంగ్రెస్ పంచిపెడుతుం’దని మరోసారి.. కాంగ్రెస్కు ఓటేసి గెలిపిస్తే, వాళ్ల పాలనలో హనుమాన్ చాలీసాను వినడాన్ని కూడా నేరంగా పరిగణిస్తారని ఇంకోసారి మోదీ వివాదాస్పద వ్యాఖ్యలు చేశారు. బీజేపీకి సీట్లు తగ్గుతాయన్న ఆందోళనతోనే మోదీ వ్యాఖ్యల్లో అసహనం, విద్వేషం పాళ్లు పెరిగినట్టు రాజకీయ నిపుణులు చెబుతున్నారు. మోదీ విద్వేష వ్యాఖ్యలపై అంతర్జాతీయ మీడియా కూడా తీవ్ర అసంతృప్తి వ్యక్తం చేసింది. దీంతో నష్టనివారణ చర్యలకు దిగిన ప్రధాని.. ముస్లిలంను చొరబాటుదారులంటూ తాను అనలేదని యూటర్న్ తీసుకొన్నారు.
ఈ లోక్సభ ఎన్నికల్లో బీజేపీని అధికారానికి దూరం చేయడం సాధ్యమయ్యే పనేనని ప్రముఖ రాజకీయ విశ్లేషకుడు యోగేంద్ర యాదవ్ పేర్కొనడం, బీజేపీకి 200 సీట్లు దాటబోవని న్యాయవాది ప్రశాంత్ భూషణ్ అంచనా వేయడం బీజేపీ నేతల్లో గుబులు పెంచింది. మోదీ మ్యాజిక్ ఈ ఎన్నికల్లో పనిచేసే అవకాశమేలేదని నివేదికలు తేల్చిచెప్పడం ఈ భయాలను రెట్టింపు చేసింది. మార్కెట్లో ప్రకంపనలు ఈ అంచనాలను ధ్రువపర్చాయి. దీంతో ప్రధాని మోదీ తన ప్రసంగాల్లో విద్వేషాన్ని చిమ్మడం ప్రారంభించినట్టు విశ్లేషకులు అభిప్రాయపడుతున్నారు.