JP Nadda | న్యూఢిల్లీ, జూన్ 9: కేంద్రంలో కొత్తగా ఏర్పాటైన మంత్రివర్గంలో బీజేపీ జాతీయ అధ్యక్షుడు జేపీ నడ్డా చేరడంతో ఆ పార్టీకి త్వరలో కొత్త చీఫ్ రానున్నట్టు తెలుస్తున్నది. ‘ఒక వ్యక్తి, ఒక పదవి’ అనే బీజేపీ పాలసీలో భాగంగా పార్టీ అధ్యక్ష బాధ్యతలను నడ్డా నుంచి మరొకరికి అప్పగించే అవకాశాలు ఉన్నాయని పార్టీ వర్గాలు పేర్కొన్నాయి.
2019 మేలో లోక్సభ ఎన్నికల తర్వాత అమిత్షా కేంద్ర హోంమంత్రి అయిన తర్వాత 2020లో బీజేపీ జాతీయ అధ్యక్షుడిగా నడ్డా బాధ్యతలు చేపట్టిన విషయం తెలిసిందే. ఆయన నాయకత్వంలోనే బీజేపీ తాజా లోక్సభ ఎన్నికలకు వెళ్లింది. అంతకుముందు అమిత్షా నాయకత్వంలో బీజేపీ 2014, 2019 ఎన్నికల బరిలోకి దిగింది.