BJP | హైదరాబాద్, జూలై 23 (నమస్తే తెలంగాణ): అధికారంలో ఉన్న ఏ పార్టీ అయినా తిరిగి అధికారంలోకి వచ్చేందుకు ఎన్నికల ముందు తాయిలాలు ప్రకటించడం సర్వసాధారణం. కానీ, బీజేపీ నేతృత్వంలోని కేంద్ర ప్రభుత్వం ఇందుకు భిన్నంగా ఎన్నికల తర్వాత ప్రవేశపెట్టిన బడ్జెట్లో వరాలు ప్రకటించడం అన్ని వర్గాలను ఆశ్చర్యపరిచింది. ఇలా ఎందుకు చేసింది? అన్నదాంట్లో పెద్దగా అర్థం కాని బ్రహ్మపదార్థం ఏమీ లేదు.
పార్లమెంట్ ఎన్నికల్లో బీజేపీకి దేశవ్యాప్తంగా ఉహించని షాక్ తగలడంతో ఇంతకాలం తాము విస్మరించి, నిర్లక్ష్యం చేసిన వర్గాలకు దగ్గర కావడానికి చేసిన ప్రయత్నంగా రాజకీయ పరిశీలకులు అభిప్రాయపడుతున్నారు. మత రాజకీయాలతో ఎల్లకాలం నెట్టుకురావడం కష్టమేనని పార్లమెంట్ ఎన్నికల ఫలితాలు చాటిచెప్పడంతో బీజేపీకి కనువిప్పు కలిగి ఉంటుందని విశ్లేషిస్తున్నారు.
నల్ల చట్టాలు, వ్యవసా య వ్యతిరేక విధానాలతో రైతులు, ఏడాదికి రెండు కోట్ల ఉద్యోగాలు ఇస్తామని మాట తప్పడంతో నిరుద్యోగ యువత, ఇంతకాలం విస్మరించిన వేతన జీవులు తదితర వర్గాలు దూరం కావడం వల్లనే పార్లమెంట్ ఎన్నికల్లో ప్రతికూల ఫలితాలు వచ్చాయని బీజేపీ ఎట్టకేలకు గ్రహించిందని చెప్తున్నారు. పదేండ్ల బీజేపీ పాలనలో ప్రవేశపెట్టిన బడ్జెట్ ప్రతిపాదనలకు తాజాగా మంగళవారం ప్రవేశ పెట్టిన బడ్జెట్కు మధ్య తేడా స్పష్టంగా కనిపించిందనే అభిప్రాయం వ్యక్తం అవుతున్నది. పార్లమెంట్ ఎన్నికల ఫలితాలు ఆ పార్టీని ఎంతగా కలవరపాటుకు గురిచేశాయో ప్రస్తుత బడ్జెట్లో ప్రకటించిన అనేక రాయితీలు, తాయిలాలు చెప్పకనే చెప్తున్నాయని అంటున్నారు.
వ్యవసాయ రంగానికి బడ్జెట్లో అధిక ప్రాధాన్యం కల్పిస్తూ రైతులు పండించే పంటలకు మద్దతు ధర కల్పిస్తామన్న హామీ, నూనె గింజలు, పప్పు ధాన్యాల ఉత్పత్తి పెంపుదలకు కృషి చేస్తామని ప్రకటించడం, ప్రధాన మంత్రి అన్న యోజన గడువు మరో ఐదేండ్ల పొడిగింపు చర్యలతో రైతాంగంలో కోల్పోయిన విశ్వాసాన్ని తిరిగి కల్పించేందుకు పూనుకున్నదన్న సంకేతాలను కేంద్రం ఇచ్చిందని పరిశీలకులు విశ్లేషిస్తున్నారు. పదేండ్ల బీజేపీ పాలనలో విస్మరించిన వర్గాలలో యువత ఒకటి. ఈ విషయాన్ని కేంద్రం గ్రహించినట్టు ఉంది.
కోటి మంది యువతకు ఉద్యోగాల కల్పన, విద్యా, ఉపాధి నైపుణ్యానికి బడ్జెట్లో రూ. 1.48 లక్షల కోట్లు ప్రకటించడంతో పాటు 4 కోట్ల మంది యువత కోసం రెండేండ్ల వ్యవధికి రూ. 2 లక్షల కోట్లు కేటాయిస్తూ ఐదు ప్రత్యేక పథకాలను ప్రకటించింది. కొత్త ఉద్యోగాల కల్పనలో భాగంగా మొదటి నెల వేతనాన్ని ప్రభుత్వమే చెల్లించనున్నట్టు ప్రకటించింది. అలాగే ఇంతకాలంగా విస్మరించిన వేతన జీవులకు ఆదాయ పన్ను లెక్కింపులో స్వల్ప ఊరట కల్పిస్తూ, రూ. 3 లక్షల ఆదాయం వరకు జీరో ట్యాక్స్, స్టాండర్డ్ డిడక్షన్ 50 నుంచి 75 వేలకు పెంచింది.