BJP – RSS | న్యూఢిల్లీ/(స్పెషల్ టాస్క్ బ్యూరో), మే 18: బీజేపీ, ఆరెస్సెస్ సంబంధాలపై ఆ పార్టీ జాతీయ అధ్యక్షుడు జేపీ నడ్డా కీలక వ్యాఖ్యలు చేశారు. ఆరెస్సెస్పై ఆధారపడే స్థాయి నుంచి సొంతంగా తన వ్యవహారాలను తానే చక్కబెట్టుకొనే స్థాయికి బీజేపీ చేరుకొన్నదని వ్యాఖ్యానించారు. ఎవరి అవసరం లేకుండానే ఇప్పుడు బీజేపీ తన కార్యకలాపాలను సొంతంగా నడుపుకొంటున్నదన్న ఆయన ఒక విధంగా ఆరెస్సెస్తో తమకు పనిలేదన్నట్టు పరోక్షంగా మాట్లాడారు. సైద్ధాంతిక సంస్థగా ఉన్న అరెస్సెస్ కూడా తన పని తాను చూసుకొంటున్నదని నడ్డా పేర్కొన్నారు. ‘ఇండియన్ ఎక్స్ప్రెస్’కు ఇచ్చిన ప్రత్యేక ఇంటర్వ్యూలో ఈ మేరకు నడ్డా వెల్లడించారు.
ఆరెస్సెస్ దాని పని అది చూసుకొంటున్నది
వాజ్పేయి ప్రధానిగా ఉన్నప్పుడు ఆరెస్సెస్తో బీజేపీకి ఉన్న సంబంధాలకు, ప్రస్తుతం ఉన్న సంబంధాలకు మధ్య తేడా ఏమిటని అడిగిన ప్రశ్నకు నడ్డా స్పందించారు. ‘ప్రారంభంలో మాకు (బీజేపీ) తక్కువ బలం ఉండేది. చిన్న శక్తిగా ఉండే వాళ్లం. అలాంటి సమయంలో ఆరెస్సెస్ అవసరం మాకు తప్పనిసరిగా మారింది. ఆరెస్సెస్పై ఆధారపడే పరిస్థితి. అయితే నేడు మేం ఎదిగాం, సొంత బలం, సామర్థ్యం సాధించాం. బీజేపీ తన కార్యకలాపాలను తానే సొంతంగా నడుపుకొనే స్థాయికి చేరింది.
ఇదే అప్పటికీ, ఇప్పటికీ ఉన్న తేడా’ అని పేర్కొన్నారు. బీజేపీకి ఇప్పుడు ఆరెస్సెస్ సపోర్ట్ అవసరం లేదా? అని అడిగిన మరో ప్రశ్నకు నడ్డా సూటిగా సమాధానం చెప్పలేదు. కానీ, ‘ఆరెస్సెస్ అనేది ఒక సాంస్కృతిక, సామాజిక, సైద్ధాంతిక సంస్థ. మా వరకు మేము (బీజేపీ) ఒక రాజకీయ పార్టీ. అలాంటప్పుడు ప్రతీ పార్టీకి ప్రత్యేకమైన బాధ్యతలు ఉంటాయి. అటు ఆరెస్సెస్, ఇటు బీజేపీ.. ఎవరి పని వాళ్లు చేసుకొంటున్నాం’ అని నడ్డా పేర్కొన్నారు.