BJP – Moradabad | ఉత్తరప్రదేశ్ లోని మొరాదాబాద్ బీజేపీ అభ్యర్థి కున్వర్ సర్వేష్ కుమార్ (72) శనివారం మరణించారు. కొంత కాలంగా అనారోగ్యంతో బాధ పడుతున్న సర్వేష్ కుమార్.. ఢిల్లీలోని ఎయిమ్స్ దవాఖానలో చికిత్స పొందుతూ మరణించారు. సర్వేష్ కుమార్ మరణాన్ని బీజేపీ యూపీ అధ్యక్షుడు భూపేంద్ర చౌదరి ధ్రువీకరించారు. ‘ఆయన గొంతులో సమస్య ఉంది. శస్త్ర చికిత్స కూడా జరిగింది. హెల్త్ చెకప్ కోసం శుక్రవారం ఎయిమ్స్ లో చేరారు` అని భూపేంద్ర చౌదరి తెలిపారు. మొరాదాబాద్ లోక్ సభా స్థానానికి తొలి దశ ఎన్నికల్లో శుక్రవారం పోలింగ్ జరిగింది.
అనారోగ్య కారణాల రీత్యా కున్వర్ సర్వేష్ కుమార్ పెద్దగా ఎన్నికల ప్రచారంలో పాల్గొనలేదు. ఐదు సార్లు యూపీ ఎమ్మెల్యేగా, ఒకసారి ఎంపీగా ఎన్నికయ్యారు. తొలిసారి 1991లో ఠాకూర్ ద్వారా అసెంబ్లీ స్థానం నుంచి బీజేపీ అభ్యర్థిగా పోటీ చేసి విజయం సాధించారు. అప్పటి నుంచి నాలుగు సార్లు ఎమ్మెల్యేగా కొనసాగారు. 2014లో లోక్ సభ ఎన్నికల్లో విజయం సాధించి, జాతీయ రాజకీయాల్లోకి వెళ్లారు.
2019 ఎన్నికల్లో సమాజ్ వాదీ పార్టీ అభ్యర్థి ఎస్టీ హసన్ చేతిలో ఓటమి పాలయ్యారు. ఠాకూర్ సామాజిక వర్గానికి చెందిన కున్వర్ సర్వేష్ కుమార్.. యూపీ ప్రముఖ రాజకీయ నేతల్లో ఒకరు. ఆయన కుమారుడు కున్వర్ సుశాంత్ సింగ్.. మొరాదాబాద్ లోక్ సభా స్థానం పరిధిలోని బాధాపూర్ నుంచి ఎమ్మెల్యేగా కొనసాగుతున్నారు.