భువనేశ్వర్, మే 26: ఈవీఎంను ధ్వంసం చేశారన్న ఆరోపణలపై ఒడిశాలోని ఖుర్దా జిల్లాలో బీజేపీ అభ్యర్థిని పోలీసులు అరెస్టు చేశారు. ప్రస్తుతం చిలికా నియోజకవర్గ ఎమ్మెల్యేగా ఉన్న ప్రశాంత్ జగ్దేవ్ ఈసారి ఒడిశా అసెంబ్లీ ఎన్నికల్లో ఖుర్దా నుంచి బీజేపీ అభ్యర్థిగా పోటీచేస్తున్నారు.
ప్రశాంత్ జగ్దేవ్.. బోలాగడ్ బ్లాక్ పరిధిలోని కౌనిపత్నలో పోలింగ్ బూత్ నంబర్ 114లో ఓటేసేందుకు రాగా, ఈవీఎం పనిచేయకపోవడంతో కొంతసేపు క్యూలో నిలబడాల్సి వచ్చింది. దీంతో సహనం కోల్పోయిన ప్రశాంత్.. టేబుల్పై ఉన్న ఈవీఎంను లాగిపడేయటంతో పగిలిపోయిందని అధికారులు పేర్కొన్నారు.