పాటియాల, మార్చి 31: ఆన్లైన్లో ఆర్డర్ చేసిన బర్త్ డే కేక్ తిని ఓ బాలిక ప్రాణాలు కోల్పోయింది. పంజాబ్లోని పాటియాలలో ఈ ఘటన జరిగింది. ఫుడ్ డెలివరీ సంస్థలపై నెటిజన్లు మండిపడుతున్నారు. పాటియాలలో 10 ఏండ్ల బాలిక పుట్టిన రోజు సందర్భంగా ఓ ఆన్లైన్ ఫుడ్ డెలివరీ యాప్ ద్వారా ఒక కేక్ ఆర్డర్ ఇచ్చారు. అయితే ఆ కేక్ను తిన్న బాలిక సహా కుటుంబ సభ్యులందరూ తీవ్ర అస్వస్థతకు గురయ్యారు. ఆ బాలిక చికిత్స పొందుతూ ఒకరోజు తర్వాత మరణించింది.
కేక్ బిల్లు కాపీని పరిశీలించగా, కేక్ కన్హా అనే బేకరి నుంచి తెప్పించినట్టు ఉంది. వాస్తవానికి అలాంటి పేరుగల బేకరీ ఏదీ పాటియాలలో లేదు. అదే సమయంలో బిల్లును చూస్తే అది అమృతసర్ నుంచి వచ్చినట్టు ఉంది. దీంతో ఆ కేక్ క్లౌడ్ కిచెన్ ద్వారా డెలివరీ అయి ఉంటుందని పలువురు నెటిజన్లు అభిప్రాయపడ్డారు. జొమాటో, స్విగ్గీలాంటి సంస్థలు లిస్టింగ్లో తాము సరఫరా చేసే ఆహారం క్లౌడ్ కిచెన్ నుంచి వస్తున్నదా లేదా అన్న విషయాన్ని స్పష్టం చేయాలని, వినియోగదారులు కూడా ఆర్డర్ ఇచ్చే ముందు అప్రమత్తంగా ఉండాలని ఒక నెటిజన్ సూచించారు.