రానున్న అసెంబ్లీ ఎన్నికల్లో హరియాణలో కాంగ్రెస్ ప్రభుత్వం ఏర్పాటు చేస్తుందని ఆ పార్టీ నేత, హరియాణ మాజీ సీఎం భూపీందర్ సింగ్ హుడా స్పష్టం చేశారు. రాష్ట్రంలో బీజేపీ సర్కార్ ఉపాధి కల్పనలో ఘోరంగా విఫలమైందని ఆరోపించారు. గత పదేండ్లుగా రాష్ట్రంలో ఎలాంటి అభివృద్ధి కార్యక్రమాలు చేపట్టలేదని దుయ్యబట్టారు. నైనీ సర్కార్ అన్ని రంగాల్లో విఫలమైందని, రాష్ట్ర ప్రజలు మార్పు కోరుకుంటున్నారని భూపీందర్ సింగ్ పేర్కొన్నారు.
ప్రజల ఆకాంక్షలకు అద్దం పట్టేలా తాము త్వరలో ఎన్నికల మేనిఫెస్టోకు రూపకల్పన చేస్తామని చెప్పారు. రానున్న హరియాణ అసెంబ్లీ ఎన్నికల్లో బీజేపీ, జేజేఎం సర్కార్కు ప్రజలు చరమగీతం పాడి, కాంగ్రెస్ సర్కార్ను కొలువుతీర్చుతారని ఆయన ధీమా వ్యక్తం చేశారు. కాగా, విపక్షాలను ఉద్దేశించి కేంద్ర మంత్రి, హరియాణ మాజీ సీఎం మనోహర్ లాల్ ఖట్టర్ కీలక వ్యాఖ్యలు చేశారు.
విపక్షం 99 మార్కులు తెచ్చుకున్న విద్యార్ధిలా సంబరపడుతున్నదని, కానీ వారికి 543కు 99 వచ్చాయని గుర్తుపెట్టుకోవాలని అన్నారు. అయితే కాంగ్రెస్ ఒక విషయానికి సంతోషపడాలని అనడంతో తాను ఏకీభవిస్తానని చెప్పారు. 2014లో వారికి కేవలం 44 సీట్లు దక్కగా, 2019లో 52 స్ధానాలు వచ్చాయని, ఈసారి వారికి కనీసం ప్రతిపక్ష హోదా దక్కిందని వ్యాఖ్యానించారు.
Read More :