భోపాల్: హాస్టల్లో బాలికపై అత్యాచారం జరిగింది. (Hostel Girl Raped) బాధిత బాలిక ఫిర్యాదుపై కేసు నమోదు చేసిన పోలీసులు రెండు వారాలకుపైగా దర్యాప్తు చేశారు. చివరకు స్కూల్ యజమాని అరెస్ట్ అయ్యాడు. కేసు నమోదు చేయవద్దని బాధితురాలి తల్లిపై ఒత్తిడి తెచ్చి సస్పెండైన పోలీస్ అధికారిని కూడా అరెస్ట్ చేశారు. మధ్యప్రదేశ్ రాజధాని భోపాల్లో ఈ సంఘటన జరిగింది. 8 ఏళ్ల బాలిక ప్రైవేట్ స్కూల్లో రెండో తరగతి చదువుతోంది. ఆ స్కూల్ హాస్టల్లో ఆ బాలిక ఉంటున్నది.
కాగా, తనపై అత్యాచారం జరిగినట్లు ఆ బాలిక ఆరోపించింది. దీంతో ఏప్రిల్ 30న ముగ్గురు గుర్తు తెలియని వ్యక్తులపై పోలీసులు కేసు నమోదు చేశారు. ఈ విషయం సీఎం మోహన్ యాదవ్ దృష్టికి వెళ్లడంతో ప్రత్యేక దర్యాప్తు బృందం (సిట్)తో దర్యాప్తునకు ఆదేశించారు. అలాగే ఫిర్యాదు చేయవద్దని బాధిత బాలిక తల్లిపై ఒత్తిడి చేసిన ఎస్ఐ ప్రకాష్ సింగ్ రాజ్పుత్ను సస్పెండ్ చేశారు.
మరోవైపు స్కూల్ హాస్టల్లో బాలికపై అత్యాచారం కేసును దర్యాప్తు చేసిన సిట్ పోలీసులు చివరకు ఆ స్కూల్ యజమానిని మంగళవారం అరెస్ట్ చేశారు. అలాగే బాధిత బాలిక తల్లిపై ఒత్తిడి చేసి సస్పెండైన ఎస్ఐ ప్రకాష్ సింగ్ రాజ్పుత్ను కూడా అరెస్ట్ చేసినట్లు డీసీపీ శ్రద్ధా తివారీ తెలిపారు. కేసులోని మిగతా ఇద్దరు నిందితులను గుర్తించేందుకు ప్రయత్నిస్తున్నట్లు వెల్లడించారు.