Gramin Bharat Bandh | ఈ నెల 16న గ్రామీణ భారత్ బంద్ రైతు సంఘాలు పిలుపునిచ్చాయి. ఈ నెల 12 నుంచి సాయంత్రం 4 గంటల వరకు దేశవ్యాప్తంగా ప్రధాన రహదారులపై రైతులు నిరసన తెలుపనున్నారు. పంజాబ్లో నిరసన సందర్భంగా రాష్ట్ర, జాతీయ రహదారుల్లో గణనీయమైన భాగాన్ని నాలుగు గంటల పాటు మూసివేయనున్నారు. బీకేయూ ప్రధాన కార్యదర్శి హరీందర్ సింగ్ లోఖోవాల్ గ్రామీణ భారత్ బంద్కు సంబంధించిన వ్యూహాన్ని వెల్లడించారు. పంటలకు కనీస మద్దతు ధర (ఎంఎస్పీ)కి హామీ ఇచ్చే చట్టంతో సహా తమ డిమాండ్లను ఆమోదించాలని కేంద్రాన్ని ఒత్తిడి చేసేందుకు సంయుక్త కిసాన్ మోర్చా (నాన్ పొలిటికల్), కిసాన్ మజ్దూర్ మోర్చా నిరసనకు పిలుపునిచ్చాయి.
ఎస్కేఎం నేషనల్ కోఆర్డినేషన్ కమిటీ (NCC) సభ్యుడు డాక్టర్ దర్శన్ పాల్ మాట్లాడుతూ డిసెంబర్లోనే గ్రామీణ భారత్ బంద్కు ప్లాన్ చేసినట్లు తెలిపారు. వ్యవసాయ పనులు, ఉపాధిహామీ పనులు, వ్యవసాయ కూలీలు, గ్రామీణ కార్మికులెవరూ పని చేయరన్నారు. అంబులెన్స్లు, వివాహాలు, చావులు, మెడికల్ షాపులు, వార్తాపత్రికల సరఫరా, బోర్డు పరీక్షలకు వెళ్లే విద్యార్థులు, విమానాశ్రయానికి వెళ్లే ప్రయాణికుల అత్యవసర సేవలకు మినహాయింపు ఇవ్వనున్నట్లు తెలిపారు. కూరగాయలు, ఇతర పంటల క్రయవిక్రయాలు, కొనుగోళ్లు నిలిచిపోతాయన్నారు.