Uttar Pradesh | లక్నో, మే 19: యూపీలోని బాదోహి వాసి భానుప్రకాశ్ తన బ్యాంక్ ఖాతాను చూసి తన కళ్లను తానే నమ్మలేకపోయాడు. లక్ష, రెండు లక్షలు కాదు ఏకంగా 9,900 కోట్ల రూపాయలు తన ఖాతాలో జమవ్వడం చూసి షాక్ తిన్నాడు. వెంటనే తన ఖాతా ఉన్న బరోడా యూపీ బ్యాంక్కు వెళ్లి అధికారులకు ఈ విషయాన్ని తెలిపాడు. వారు కూడా అతని ఖాతాను పరిశీలించగా రూ.99, 99,94,95,999.99 నిల్వ ఉండటాన్ని గుర్తించారు.
సాంకేతిక కారణాల వల్ల ఆ మొత్తం అతని ఖాతాలో పడినట్టు గుర్తించి ముందు జాగ్రత్తగా అతని ఖాతాను స్తంభింప చేసి తప్పును సవరించారు. వాస్తవానికి భానుప్రకాశ్ది కిసాన్ క్రెడిట్ కార్డ్ (కేసీసీ) లోన్ అకౌంట్ అని, కానీ కొన్ని సాంకేతిక సమస్యల కారణంగా అతని ఖాతా నాన్ పెర్ఫార్మింగ్ అసెట్ (ఎన్పీఏ)గా మారిపోయిందని, దానిని సవరించామని బ్యాంక్ అధికారులు తెలిపారు. సకాలంలో దీని గురించి తమకు తెలియజేసిన ఖాతాదారుడు భానుప్రకాశ్కు వారు కృతజ్ఞతలు తెలిపారు.