బెంగళూరు: శస్త్రచికిత్స సమయంలో వైద్యుల నిర్లక్ష్యానికిగాను కొన్నేండ్లపాటు తీవ్రమైన కడుపు, నడుము నొప్పితో బాధపడిన మహిళకు రూ. 5 లక్షల పరిహారం చెల్లించాలంటూ కర్ణాటక వినియోగదారుల ఫోరం 20 ఏండ్ల తర్వాత ఆదేశించింది.
బెంగళూరుకు చెందిన పద్మావతి 32 ఏండ్ల వయసులో హెర్నియా ఆపరేషన్ కోసం 2004 సెప్టెంబర్ 29న దీపక్ దవాఖానలో చేరింది. సర్జరీ పూర్తయ్యాక ఆమె అపెండిక్స్ను కూడా తొలగించారు. ఆ తర్వాతి రోజే ఆమె కడుపునొప్పితో బాధపడగా వైద్యులు కొన్ని నొప్పి నివారణ మాత్రలు ఇచ్చి పంపించారు. ఆ తర్వాత కూడా ఆమె తీవ్రమైన కడుపునొప్పి, నడుమునొప్పితో బాధపడగా అదే దవాఖానలో రెండుసార్లు చేరింది.
అయినప్పటికీ ఫలితం లేకపోవడంతో 2010లో మరో ప్రైవేటు దవాఖానలో చూపించుకుంది. అక్కడామెకు స్కానింగ్ చేసిన వైద్యులు ఆమె పొత్తికడుపులో 3.2 సెంటీమీటర్ల సర్జికల్ సూది ఉన్నట్టు గుర్తించి తొలగించారు. అనంతరం ఆమె తనకు తొలుత ఆపరేషన్ చేసిన దీపక్ దవాఖాన వైద్యుల నిర్లక్ష్యంపై వినియోగదారుల కోర్టుకెక్కింది.