కోల్కతా: పశ్చిమబెంగాల్లో ఉప ఎన్నికల్లో గెలిచిన ఇద్దరు టీఎంసీ ఎమ్మెల్యేల ప్రమాణస్వీకారంపై రగడ కొనసాగుతున్నది. స్పీకర్ వారి చేత ప్రమాణం చేయించడం, తాజాగా సోమవారం నుంచి ప్రారంభమైన అసెంబ్లీ సమావేశాలకు హాజరు కావడం రాజ్యాంగ నిబంధనలకు విరుద్ధమని పేర్కొంటూ రాజ్భవన్ ఆ ఇద్దరు శాసనసభ్యులపై రూ.500 చొప్పున జరిమానా విధించింది. ఈ మేరకు గవర్నర్ సీవీ ఆనంద బోస్ కార్యాలయం నుంచి తమకు మెయిల్స్ వచ్చాయని ఎమ్మెల్యేలు హుస్సేన్ సర్కార్, శయంతికా బెనర్జీ సోమవారం వెల్లడించారు.
ప్రమాణ స్వీకార ప్రక్రియ చట్టబద్ధతను ప్రశ్నించిన రాజ్భవన్.. రూ.500 జరిమానా చెల్లించాలని ఆదేశించిందని పేర్కొన్నారు. ఈనెల 5న ఇద్దరు ఎమ్మెల్యేల ప్రమాణ స్వీకార ప్రక్రియను గవర్నర్ డిప్యూటీ స్పీకర్ అశిష్ బెనర్జీకి అప్పగించగా.. వారిద్దరి చేత స్పీకర్ బిమన్ బెనర్జీ ప్రమాణం చేయించారు. దీనిపై తాము స్పీకర్ను కలిశామని శయంతికా బెనర్జీ తెలిపారు. ఈ అంశాన్ని స్పీకర్ కార్యాలయం చూసుకుంటుందని ఆయన చెప్పారని పేర్కొన్నారు. తాము జరిమానా చెల్లించేది లేదని స్పష్టం చేశారు.