కోల్కతా, మే 3: తమను గెలిపిస్తే రోడ్లు వేస్తాం, కమ్యూనిటీ హాళ్లు కట్టిస్తాం అంటూ రకరకాల హామీలు ఇచ్చే అభ్యర్థులను చాలామందినే చూశాం. కానీ, పశ్చిమ బెంగాల్లోని ఘటల్ లోక్సభ స్థానం నుంచి తృణమూల్ కాంగ్రెస్ అభ్యర్థిగా పోటీ చేస్తున్న దీపక్ అధికారి(దేవ్) రూటు సపరేటు. తనకు వేసే ఓట్లకు బదులుగా మొక్కలు నాటుతానని ఆయన ప్రజలకు హామీ ఇచ్చారు. తనకు ఎన్ని ఓట్లు పోలైతే అన్ని మొక్కలు నాటుతానని ప్రకటించారు. తనకు తొమ్మిది లక్షల ఓట్లు వస్తే.. తొమ్మిది లక్షల మొక్కలు నాటుతానని చెప్పారు. అంతేకాదు, నామినేషన్ వేసే విషయంలోనూ ఆయన అందరు అభ్యర్థులకు భిన్నంగా వ్యవహరించారు.
ముందుగా రక్తదానం చేసి, ఆ తర్వాత నామినేషన్ వేశారు. ప్రస్తుతం బ్లడ్ బ్యాంకులు రక్తం కొరతతో సంక్షోభంలో ఉన్నాయని, ప్రజలు రక్తదానం చేసేందుకు ముందుకు రావాలనే ఆలోచనతో ఈ పని చేసినట్టు ఆయన ప్రకటించారు. బెంగాల్ నటుడైన దేవ్ 2014, 2019లో ఘటల్ నుంచి ఎంపీగా విజయం సాధించి మూడోసారి బరిలో నిలిచారు. కాగా, దేవ్ను బీఆర్ఎస్ మాజీ ఎంపీ సంతోశ్ కుమార్ అభినందించారు. రాజకీయ లక్ష్యాన్ని పర్యావరణ సుస్థిరతతో మేళవించేలా ఈ నిర్ణయం ఉన్నదని ఆయన ‘ఎక్స్’లో పేర్కొన్నారు.