అహ్మదాబాద్: ఇద్దరి మరణానికి కారణమైన పార్శిల్ బాంబు (Parcel Bomb) వెనుక ఒక తప్పుడు వ్యవహారం ఉందని పోలీసులు తేల్చారు. మృతుడి భార్యతో అక్రమ సంబంధం ఉన్న వ్యక్తి టేప్ రికార్డర్ను పోలిన పార్శిల్ బాంబును ఆ ఇంటికి పంపాడని వెల్లడించారు. గుజరాత్లోని వడాలిలో గురువారం మధ్యాహ్నం ఒక ఇంట్లో పార్శిల్ బాంబు పేలింది. కూలీ అయిన 32 ఏళ్ల జీతూభాయ్ హీరాభాయ్ వంజర, అతడి కుమార్తె అయిన 12 ఏళ్ల భూమిక ఈ సంఘటనలో మరణించారు. 9, 10 ఏళ్ల వయసున్న మరో ఇద్దరు కుమార్తెలు తీవ్రంగా గాయపడ్డారు. ప్రస్తుతం ఆసుపత్రిలో వారు చికిత్స పొందుతున్నారు.
కాగా, స్థానికంగా కలకలం రేపిన ఈ సంఘటనపై పోలీసులు దర్యాప్తు జరిపారు. ఆ ప్రాంతంలోని సీసీటీవీ ఫుటేజ్ను పరిశీలించారు. ఒక ఆటో డ్రైవర్ ఆ పార్శిల్ను ఆ ఇంటికి డెలివరీ చేసినట్లు పోలీసులు గుర్తించారు. ఆటో డ్రైవర్ స్టేట్మెంట్ ఆధారంగా నిందితుడైన 31 ఏళ్ల జయంతిభాయ్ బాలుసింగ్ వంజరను అరెస్ట్ చేశారు. పోలీసులు అతడ్ని ప్రశ్నించగా తన మాజీ ప్రియురాలిని జీతూభాయ్ పెళ్లి చేసుకోవడం ఇష్టం లేకపోవడంతో అతడ్ని చంపేందుకు కుట్ర పన్నినట్లు తెలిపాడు. టేప్ రికార్డ్ను పోలిన పార్సిల్ బాంబును జీతూభాయ్ ఇంటికి పంపినట్లు చెప్పాడు.
మరోవైపు ఈ పార్శిల్ బాంబును తయారు చేసేందుకు జయంతిభాయ్ రాజస్థాన్కు వెళ్లాడని పోలీసులు తెలిపారు. జిలాటిన్ స్టిక్స్, డిటోనేటర్ను ఉపయోగించినట్లు చెప్పారు. పార్శిల్ను తెరిచిన జీతూభాయ్, అతడి కుమార్తెలు టేప్ రికార్డర్ ప్లగ్ను కరెంట్ సాకెట్లో పెట్టి స్విచ్ వేయడంతో అది పేలిందని వెల్లడించారు. ఆ సమయంలో జీతూభాయ్ భార్య ఇంట్లో లేదని పోలీసులు తెలిపారు. పార్శిల్ బాంబు కుట్రలో ఆమె ప్రమేయంతోపాటు ఈ సంఘటనపై మరింతగా దర్యాప్తు చేస్తున్నట్లు చెప్పారు.