Delhi Water crisis : ఢిల్లీలో నీటి సంక్షోభంపై తాను ప్రధాని నరేంద్ర మోదీకి లేఖ రాశానని ఢిల్లీ మంత్రి అతిషి బుధవారం వెల్లడించారు. దేశ రాజధానిలో నీటి సమస్యను పరిష్కరించని పక్షంలో ఈనెల 21 నుంచి నిరవధిక నిరాహార దీక్ష చేపడతానని ఆమె హెచ్చరించారు. నీటి సమస్యను సత్వరమే పరిష్కరించాలని ప్రధానికి రాసిన లేఖలో తాను విజ్ఞప్తి చేశానని తెలిపారు.
ఢిల్లీకి రావాల్సిన నీటి వాటాను హరియాణ సరఫరా చేయకపోవడంతో దేశ రాజధాని ప్రజలు తీవ్ర ఇబ్బందులు ఎదుర్కొంటున్నారని ఆమె ఆందోళన వ్యక్తం చేశారు. హరియాణ మంగళవారం 613ఎంజీడీ నీటిని సరఫరా చేయాల్సి ఉండగా 513ఎంజీడీ నీటిని మాత్రమే నగరానికి సరఫరా చేసిందని ఆమె వెల్లడించారు. ఒక ఎంజీడీ నీరు 28,500 మందికి సరిపోతుందని, దీంతో 28 లక్షల మంది ప్రజలకు నీటి సరఫరా నిలిచిపోయిందని చెప్పారు.
ఈ సమస్య పరిష్కారం కోరుతూ తాను హరియాణ ప్రభుత్వానికి పలుమార్లు లేఖ రాసినా ఫలితం లేకపోయిందని ఆవేదన వ్యక్తం చేశారు. ఇక నీటి చౌర్యం, బ్లాక్ మార్కెటింగ్ అంశాల నుంచి నగరవాసుల దృష్టి మరల్చేందుకు అతిషి ఇప్పుడు సరికొత్త దిగజారుడు రాజకీయానికి తెరలేపారని ఢిల్లీ బీజేపీ చీఫ్ వీరేంద్ర సచ్దేవా ఆరోపించారు.
Read More :