భోపాల్: మధ్యప్రదేశ్లో వచ్చే ఏడాది చివరిలో అసెంబ్లీ ఎన్నికలు జరుగనున్నాయి. కాంగ్రెస్లో తిరుగుబావుటా ఎగురవేయించి అడ్డదారిలో అధికారం చేజిక్కించుకున్న బీజేపీకి ఓటమి భయం పట్టుకున్నది. వచ్చే ఎన్నికల్లో గట్టెక్కడం కష్టమని పార్టీ అంతర్గత సర్వేల్లోనే వెల్లడైంది.
ఒక ఆంగ్ల దినపత్రిక కథనం ప్రకారం.. 127 శాసనసభ్యుల పనితీరుపై పార్టీ అంతర్గత పరిశీలన జరుపగా అందులో సగానికిపైగా ఎమ్మెల్యేలపై ప్రజల్లో తీవ్ర వ్యతిరేకత ఉన్నదని, వారు మళ్లీ గెలుపొందడం కష్టమని నిర్ధారణ అయ్యింది. దీంతో సీఎం శివరాజ్సింగ్ చౌహాన్ దిద్దుబాటు చర్యలకు దిగారు. పనితీరు సరిగాలేని ఎమ్మెల్యేలను పిలిచి ఒక్కొక్కరితో విడివిడిగా భేటీ అవుతున్నారు. ఎమ్మెల్యేల్లో 45 శాతం మందికి టికెట్లు నిరాకరించి, కొత్తవారిని బరిలో నిలపాలని అధిష్టానం భావిస్తున్నది.