అహ్మదాబాద్ : పంజాబ్ అసెంబ్లీ ఎన్నికలకు ముందు సీఎం అభ్యర్ధి కోసం ప్రజాభిప్రాయం సేకరించిన తరహాలో గుజరాత్లోనూ ఆప్ అదే వ్యూహాన్ని అనుసరిస్తోంది. గుజరాత్ అసెంబ్లీ ఎన్నికలకు ముందు ఆప్ సీఎం అభ్యర్ధి ఎంపిక ప్రక్రియను ఢిల్లీ సీఎం అరవింద్ కేజ్రీవాల్ సూరత్లో శనివారం ప్రారంభించారు. తదుపరి సీఎం ఎవరనేది గుజరాత్ ప్రజలు తమకు చెప్పాలని తాము కోరుకుంటున్నామని ఈ సందర్భంగా కేజ్రీవాల్ పేర్కొన్నారు.
ఈ దిశగా ప్రజాభిప్రాయం వెల్లడించేందుకు తాము ఓ మొబైల్ నెంబర్, ఈ మెయిల్ ఐడీని ప్రజలకు వెల్లడిస్తున్నామని చెప్పారు. నవంబర్ 3 సాయంత్రం 5 గంటల వరకూ ప్రజలు తమ అభిప్రాయాలను తెలపవచ్చని చెప్పారు. నవంబర్ 4న తాము ఫలితం ప్రకటిస్తామని ఆప్ జాతీయ కన్వీనర్ కేజ్రీవాల్ తెలిపారు.
గుజరాత్లో ఎలాగైనా పాగా వేయాలని యోచిస్తున్న ఆప్ ఇప్పటికే రాష్ట్రంలో పలు ర్యాలీలు, బహిరంగ సభలను నిర్వహించడంతో పాటు గుజరాత్లో అధికారంలోకి వస్తే ఉచిత విద్యుత్, ఉచిత విద్య, వైద్యం అందుబాటులోకి తీసుకువస్తామని పలు హామీలను గుప్పించింది.