న్యూఢిల్లీ: సాధారణ ప్రయాణికులకు ఊరట కలగనున్నది. రైళ్లలో జనరల్ కోచ్ల సంఖ్య నాలుగుకు పెరుగనున్నాయి. స్లీపర్, జనరల్ క్లాస్ కోచ్లలో విపరీతమైన రద్దీపై ప్రయాణికులు ఆందోళన చెందుతున్నారు. ఈ నేపథ్యంలో మెయిల్, ఎక్స్ప్రెస్ రైళ్లలో జనరల్ కోచ్ల సంఖ్యను రెట్టింపు చేస్తున్నట్లు రైల్వే మంత్రిత్వ శాఖ ప్రకటించింది. ఇటీవల జరిగిన రైల్వే బోర్డు సమావేశంలో పలు కీలక నిర్ణయాలు తీసుకున్నారు. రైలు కోచ్ల వార్షిక ఉత్పత్తి కంటే అదనంగా 2500 జనరల్ క్లాస్ కోచ్లు తయారు చేయనున్నారు. దీంతో మెయిల్, ఎక్స్ప్రెస్ రైళ్ల సామర్థ్యం గణనీయంగా పెరుగుతుందని అంచనా వేశారు.
కాగా, ప్రస్తుతం రెండు జనరల్ కోచ్లు ఉన్న రైళ్లలో వాటి సంఖ్య నాలుగుకు రెట్టింపు అవుతుందని సీనియర్ రైల్వే అధికారి తెలిపారు. జనరల్ కోచ్లు లేని రైళ్లకు రెండు సమకూరుతాయని చెప్పారు. ఒక్కో జనరల్ కోచ్లో 150 నుంచి 200 మంది ప్రయాణించేలా తయారు చేస్తున్నట్లు వెల్లడించారు. దీంతో ప్రతి రోజూ అదనంగా ఐదు లక్షల మంది జనరల్ కోచ్లో ప్రయాణించ వచ్చని అన్నారు.
మరోవైపు జనరల్ కోచ్ల పెంపు ప్రణాళికతో మెయిల్, ఎక్స్ప్రెస్ రైళ్ల సామర్థ్యం పెరుగుతుందని రైల్వే అధికారులు తెలిపారు. దీని కోసం 1377 స్లీపర్ క్లాస్ కోచ్లతోపాటు అదనంగా 2500 జనరల్ కోచ్లు ప్రస్తుత ఆర్థిక సంవత్సరంలో అందుబాటులోకి వస్తాయని చెప్పారు. దీంతో జనరల్ బోగిల్లో ఏటా 18 కోట్ల మంది ప్రయాణికులు ట్రావెల్ చేసేందుకు వీలు కలుగుతుందని వివరించారు.