లక్నో: లోక్సభ ఎన్నికల్లో ఓడిపోయిన ఇండియా కూటమి అభ్యర్థులను ‘సమ్మాన్సద్’ బిరుదుతో సత్కరిస్తామని సమాజ్వాదీ పార్టీ చీఫ్ అఖిలేశ్ యాదవ్ చెప్పారు. ఎన్నికల ఫలితాలపై ఆయన ఎక్స్ వేదికగా స్పందిస్తూ, బీజేపీ పాల్పడిన పాలనపరమైన కుంభకోణాల కారణంగా గెలవలేకపోయిన తమ అభ్యర్థులంతా వాస్తవంగా విజేతలేనని తాము నమ్ముతున్నామన్నారు. బీజేపీకి లభించిన ఓట్లు ప్రజలు వేసినవి కాదన్నారు. ఆ పార్టీ పరిపాలనా విధానం, వారి కుంభకోణాల వల్లే ఆ పార్టీకి ఓట్లు వచ్చాయన్నారు. ప్రజలు పూర్తిగా ఇండియా కూటమి అభ్యర్థులకే మద్దతిచ్చి, గౌరవించారని, అందుకే అలాంటి అభ్యర్థులందరినీ నిజమైన ప్రజా ప్రతినిధులుగా పరిగణిస్తున్నామని తెలిపారు.