న్యూఢిల్లీ: ఈ ఏడాది జూలై ఒకటో తేదీ నాటికి నో ఫ్లై లిస్టు(No-Fly List)లో 51 మంది పేర్లను చేర్చినట్లు విమానయాన శాఖ ఇవాళ వెల్లడించింది. విమానాల్లో అనుచితంగా ప్రవర్తించే ప్రయాణికులను ఆ జాబితాలో చేర్చినట్లు డీజీసీఏ పేర్కొన్నది. గడిచిన అయిదేళ్లలో నో ఫ్లై లిస్టులో చేరిన ప్రయాణికుల సంఖ్య 300 చేరింది. నో ఫ్లై లిస్టుకు చెందిన డేటాను విమానయాన శాఖ సహాయ మంత్రి మురళీధర్ మోహోల్ ఇవాళ రాజ్యసభలో తెలిపారు. 2023లో 110 ప్రయాణికులను నో ఫ్లై లిస్టులో చేర్చినట్లు చెప్పారు. 2022లో 63 మంది, 2021లో 66 మంది నో ఫ్లై లిస్టులో ఉన్నారు. విమానయాన శాఖ డేటా ప్రకారం.. 2020లో ఆ జాబితాలో కేవలం 10 మంది ప్రయాణికులు మాత్రమే ఉన్నారు.