న్యూఢిల్లీ, మే 9: ఉద్యోగులు లేవనెత్తిన అంశాలపై చర్చించడానికి ‘ఎయిర్ ఇండియా ఎక్స్ప్రెస్’ అంగీకరించటంతో క్యాబిన్ సిబ్బంది సమ్మెను విరమించారు. గురువారం న్యూఢిల్లీలో చీఫ్ లేబర్ కమిషనర్ (సెంట్రల్) కార్యాలయంలో ఎయిర్ ఇండియా ఎక్స్ప్రెస్, ఉద్యోగుల సంఘానికి (ఏఐఎక్స్ఈయూ) మధ్య ఐదు గంటలపాటు జరిగిన చర్చలు ఫలించాయి.
విధుల నుంచి తొలగింపునకు గురైన 25 మంది క్యాబిన్ సిబ్బందిని తిరిగి విధుల్లోకి తీసుకోవడానికి యాజమాన్యం అంగీకరించింది. దీంతో తాము చేపట్టిన నిరసనను క్యాబిన్ ఉద్యోగులు విరమించారు. ఉద్యోగుల సమస్యలపై మే 28న ఇరు వర్గాలు చర్చించనున్నాయి. దాదాపు 300మందికిపైగా క్యాబిన్ సిబ్బంది మూకుమ్మడి సెలవులు తీసుకోవటంతో, మంగళవారం రాత్రి నుంచి సంక్షోభం మొదలైంది. సుమారుగా 170కిపైగా విమానాలను ‘ఎయిర్ ఇండియా ఎక్స్ప్రెస్’ రద్దు చేసుకోవాల్సి వచ్చింది. దీంతో వేలాది మంది విమాన ప్రయాణికులు తీవ్ర అసౌకర్యానికి గురయ్యారు.
మరో 85 విమానాలు రద్దు
క్యాబిన్ సిబ్బంది మూకుమ్మడిగా సిక్ సెలవులు కారణంగా గురువారం మరో 85 ఎయిర్ ఇండియా ఎక్స్ప్రెస్ విమానాలు రద్దు చేయాల్సి వచ్చింది. తొలగించిన ఉద్యోగుల్ని తిరిగి విధుల్లోకి చేర్చుకోకపోతే మిగతా సిబ్బంది కూడా రారని ఉద్యోగ సంఘాల ప్రతినిధి తొలుత తేల్చి చెప్పారు. ‘సిబ్బంది పట్ల యాజమాన్యం సరైన వైఖరి అనుసరించటం లేదు.
సీనియర్ స్థానాలకు జరిగిన ఇంటర్వ్యూలను కొంతమంది పూర్తిచేసినా.. వారికి ఆ ఉద్యోగాలు ఇవ్వలేదు. మెరుగైన వేతన ప్యాకేజీలు అమలు జేయటం లేదు’ అని ‘ఏఐఎక్స్ఈయూ’ ప్రతినిధులు తెలిపారు. ఉద్యోగుల ఆందోళనకు సహేతుకమైందని రీజినల్ లేబర్ కమిషనర్ అభిప్రాయపడ్డారు. కార్మిక చట్టాల ఉల్లంఘనలు సంస్థలో పెద్ద ఎత్తున ఉందన్న సంగతి మే 3న ఎయిర్ ఇండియా చైర్మన్ నటరాజన్ చంద్రశేఖరన్కు రాసిన లేఖలో కమిషనర్ పేర్కొన్నారు.