Divorce | కేవలం ఐదు రూపాయల కుర్కురే వల్ల వచ్చిన వివాదం భార్యాభర్తల దాంపత్య జీవితంలో చిచ్చుపెట్టింది. తనకు కుర్కురే ప్యాకెట్ కొనివ్వలేదని భర్తతో గొడవపడి పుట్టింటికి వెళ్లిపోయింది. భర్తకు విడాకులు ఇచ్చేందుకు సిద్ధమయ్యింది. ఈ వింత ఘటన ఉత్తర్ప్రదేశ్ రాష్ట్రం ఆగ్రాలోని షాహ్ గంజ్లో చోటుచేసుకుంది.
వివరాల్లోకి వెళ్తే.. షాహ్గంజ్కు చెందిన ఓ దంపతులకు గత ఏడాదిలో వివాహమయ్యింది. అయితే ఆ భార్యకు కుర్కురే అంటే చెప్పలేనంత పిచ్చి. రోజూ కచ్చితంగా ఒక కుర్కురే ప్యాకెట్ తినాల్సిందే. పెళ్లయిన కొత్తలో ఇదే విషయం భర్తకు చెబితే సరే అన్నాడు. ఇచ్చిన మాట ప్రకారం ఇంటికి వచ్చేటప్పుడు రెగ్యులర్గా ఐదు రూపాయల కుర్కురే ప్యాకెట్ కొనుక్కొచ్చి ఇచ్చేవాడు. అయితే వర్క్ బిజీలోనో.. మరో కారణంతోనో.. ఒకరోజు కుర్కురే ప్యాకెట్ తీసుకెళ్లడం మరిచిపోయాడు. ఇంకేముంది.. ఆ భార్య హర్ట్ అయ్యింది. తనకు ఎంతో ఇష్టమైన కుర్కురే తీసుకురాలేదని భర్తతో గొడవకు దిగింది. ఇంత చిన్న విషయానికి అంత రాద్దాంతం ఎందుకు చేస్తున్నావని భర్త అన్నప్పటికీ వినిపించుకోలేదు. దీంతో అలిగిన భార్య.. తన పుట్టింటికి వెళ్లిపోయింది. తన కోరిక తీర్చని వాడితో కలిసి ఉండే బదులు విడిపోవడమే బెటర్ అని ఫిక్సయ్యింది.
తనకు విడాకులు ఇప్పించాలని షాహ్గంజ్ పోలీసులకు సదరు భార్య ఫిర్యాదు చేసింది. ఈ మేరకు భార్య ఫిర్యాదును పోలీసులు ఫ్యామిలీ కౌన్సెలింగ్ సెల్కు బదిలీ చేశారు. దీంతో భార్యాభర్తలను పిలిపించి కౌన్సెలింగ్ ఇచ్చారు. పెళ్లయిన ఏడాదిలోనే విడాకులు ఎందుకు తీసుకుంటున్నారని అక్కడ అధికారులు ప్రశ్నించగా.. భర్త తనను కొట్టాడని చెప్పింది. ఎందుకు కొట్టాడని కారణం ఆరా తీయగా.. అసలు విషయం చెప్పింది. కుర్కురే కోసం గొడవ జరిగిందని తెలిసి అధికారులు షాకయ్యారు. చిన్న కారణంతోనే విడాకులకు సిద్ధమైన భార్యకు, ఆమెతో గొడవకు దిగిన భర్తకు అధికారులు కౌన్సెలింగ్ ఇచ్చారు. ఇద్దరి మధ్య రాజీ కుదిర్చేందుకు నచ్చజెప్పారు. కాగా, ప్రస్తుతం వీరి విడాకుల కేసు వాయిదా పడింది.