లక్నో: ఒక వ్యక్తి తన భార్యను అనుమానించాడు. ఏడాది వయసున్న కుమారుడికి తాను తండ్రి కాదని భావించాడు. ఈ నేపథ్యంలో పసి బాలుడ్ని హత్య చేశాడు. (Man Kills one Year Old Son) భార్య ఫిర్యాదుతో ఆ వ్యక్తిని పోలీసులు అరెస్ట్ చేశారు. ఉత్తరప్రదేశ్లోని బహ్రైచ్ జిల్లాలో ఈ సంఘటన జరిగింది. రూపైదిహ పోలీస్ స్టేషన్ పరిధిలోని ప్రాంతానికి చెందిన సుజిత్ తన భార్యను అనుమానించాడు. ఏడాది వయస్సున్న కొడుకు తన బిడ్డ కాదని ఆమెతో గొడవ పడేవాడు. ఈ నేపథ్యంలో గురువారం ఆ పసి బాలుడ్ని హత్య చేశాడు.
కాగా, కుమారుడు అచేతనంగా పడి ఉండటాన్ని సుజిత్ భార్య గమనించింది. వెంటనే స్థానిక ఆసుపత్రికి తీసుకెళ్లింది. చికిత్స పొందుతూ ఆ బాలుడు మరణించాడు. ఈ నేపథ్యంలో తన బిడ్డను భర్త చంపాడంటూ పోలీసులకు ఆమె ఫిర్యాదు చేసింది. దీంతో హత్య కేసు నమోదు చేశారు. సుజిత్ను పోలీసులు అరెస్ట్ చేశారు. కుమారుడు తన బిడ్డ కాదని, అందుకే చంపినట్లు అతడు చెప్పాడని పోలీస్ అధికారి తెలిపారు. ఈ సంఘటనపై దర్యాప్తు చేస్తున్నట్లు వెల్లడించారు.