Heatwaves | ఉత్తరాది రాష్ట్రాలు అగ్నిగోళంలా మండిపోతున్నాయి. ఈ సమ్మర్లో అక్కడ రికార్డు స్థాయి ఉష్ణోగ్రతలతో సూర్యుడు తన ప్రతాపం చూపిస్తున్నాడు. పలు రాష్ట్రాల్లో ఇప్పటికే ఉష్ణోగ్రతలు 50 డిగ్రీలు దాటేశాయి. రెండు రోజుల క్రితం దేశ రాజధాని ఢిల్లీని ముంగేష్పూర్లో 52.9 డిగ్రీల గరిష్ఠ ఉష్ణోగ్రత నమోదైంది. దీనికే ప్రజలు అమ్మో అనుకుంటుండగా.. ఇవాళ మహారాష్ట్రలో ఆ రికార్డును దాటేస్తూ గరిష్ఠ ఉష్ణోగ్రతలు నమోదయ్యాయి. నాగ్పూర్లో అత్యధికంగా 56 డిగ్రీల ఉష్ణోగ్రత నమోదైంది.
కాగా, రికార్డు స్థాయి ఎండల కారణంగా మనుషులు పిట్టల్లా రాలిపోతున్నారు. గడిచిన 24 గంటల్లో వడ దెబ్బ కారణంగా పలు రాష్ట్రాల్లో 54 మంది ప్రాణాలు కోల్పోయారు. బిహార్లో అత్యధికంగా 32 మంది మరణించగా.. ఒడిశాలో 10, జార్ఖండ్లో 5, రాజస్థాన్లో 5, ఉత్తర్ప్రదేశ్లో ఒకరు, ఢిల్లీలో ఒకరు మరణించారు. కాగా, రానున్న రెండు రోజుల్లో యూపీ, ఢిల్లీ, చండీగఢ్, హర్యానాలోని పలు ప్రాంతాల్లో దుమ్ము తుఫాన్లు వచ్చే అవకాశాలు ఉన్నాయని వాతావరణ శాఖ అంచనావేస్తోంది.