లక్నో: ఉత్తరప్రదేశ్లోని ప్రయాగ్రాజ్లో శుక్రవారం దుండగుల కాల్పుల్లో మరణించిన ఉమేష్ పాల్ హత్య కేసు (Umesh Pal murder case) నిందితుల్లో ఒకడు పోలీస్ ఎన్కౌంటర్లో చనిపోయాడు. ప్రయాగ్రాజ్లోని నెహ్రూ పార్క్ వద్ద నిందితుడు అర్బాజ్ను స్పెషల్ ఆపరేషన్స్ పోలీసులు సోమవారం గుర్తించారు. ఈ సందర్భంగా జరిగిన ఎన్కౌంటర్లో అతడ్ని కాల్చి చంపారు. ఉమేష్ పాల్ హత్య కోసం నిందితులను కారులో అతడు తరలించినట్లు పోలీసులు ఆరోపించారు. 2005లో హత్యకు గురైన బీఎస్పీ ఎమ్మెల్యే రాజు పాల్ మర్డర్ కేసులో ఉమేష్ ప్రధాన సాక్షిగా ఉన్నారు. శుక్రవారం సాయంత్రం ప్రయాగ్రాజ్లోని ఇంటి వద్ద కారు నుంచి దిగుతున్న ఆయనపై దుండగుడుల కాల్పులు జరిపారు. ఉమేష్ పాల్ శరీరంలోకి ఏడు బుల్లెట్లు దిగడంతో ఆయన చనిపోయారు.
కాగా, ఉమేష్ పాల్ హత్యపై ఆయన భార్య పోలీసులకు ఫిర్యాదు చేసింది. దీంతో మాజీ ఎంపీ అతిక్ అహ్మద్ సోదరుడు, భార్య షైస్తా పర్వీన్, ఆయన కుమారులు అహ్జాన్, అబాన్తో పాటు పలువురిపై కేసు నమోదు చేశారు. బీజేపీ నేత రహీల్ హసన్ సోదరుడు గులాం పేరు కూడా ఎఫ్ఐఆర్లో ఉండటంతో ఆ పార్టీ నుంచి ఆయనను తొలగించారు.
ఉమేష్ పాల్ హత్య కేసుకు సంబంధించి మాజీ ఎంపీ అతిక్ అహ్మద్ బంధువులతో సహా 40 మంది నిందితులను పోలీసులు అరెస్ట్ చేశారు. ప్రస్తుతం అహ్మదాబాద్లోని సబర్మతి జైలులో ఉన్న అతిక్ ఖాన్, ఉమేష్ పాల్ హత్యకు కుట్రపన్నినట్లు పోలీసులు అనుమానిస్తున్నారు. ఈ నేపథ్యంలో జైలులో ఉన్న ఆయనను ప్రశ్నించేందుకు సిద్ధమవుతున్నారు. అలహాబాద్ (పశ్చిమ) అసెంబ్లీ స్థానం నుంచి గెలిచిన కొన్ని నెలలకే బీఎస్పీ ఎమ్మెల్యే రాజు పాల్ను హత్య చేశారు. తొలిసారి ఎన్నికల్లో పోటీ చేసిన మాజీ ఎంపీ అతిక్ అహ్మద్ తమ్ముడు ఖలీద్ అజీమ్ను ఓడించడం వల్లనే ఆయన హత్యకు గురైనట్లు ఆరోపణలున్నాయి.
మరోవైపు, ఉమేష్ పాల్ హత్య కేసును సీబీఐతో దర్యాప్తు జరిపించాలని అతిక్ అహ్మద్ భార్య షైస్తా పర్వీన్ డిమాండ్ చేసింది. ప్రయాగ్రాజ్ పోలీస్ కమిషనర్ రమేష్ శర్మ, ఏడీజీ ఎస్టీఎఫ్ అమితాబ్ యాష్ కలిసి ప్రత్యర్థులతో కుమ్మక్కయ్యారని ఆమె విమర్శించింది. తన భర్త అతిక్ అహ్మద్, అతిక్ తమ్ముడు అష్రఫ్లను హత్య చేయడానికి వారు కుట్ర చేస్తున్నారని ఆరోపించింది. సీఎం యెగి ఆదిత్యనాథ్కు ఈ మేరకు ఒక లేఖ రాసింది.
“मिट्टी में मिलाने का अभियान” शुरू, उमेश पाल का एक हत्यारा अरबाज़ पुलिस मुठभेड़ में ढेर, जय हो !! pic.twitter.com/JGx2xz2iHg
— Dr. Shalabh Mani Tripathi (@shalabhmani) February 27, 2023